Na Youtube siońnia źjaviŭsia zvarot žančyny, jak jana kaža, ad «snajpierki z Barysava», zapisany, jak śćviardžaje, 28 žniŭnia.
«Ja žyvu, siońnia 28 žniŭnia, 27 žniŭnia ŭ Internecie źjaviłasia infarmacyja, što ja zahinuła, heta nie tak. Ja chaču admovicca ad hramadzianstva Biełarusi, ja sparoła z formy biełaruski ściah, ja nie chaču jaho nasić. Mnie pierastaŭ padabacca moj prezident, bo jon padtrymlivaje Parašenku. U internecie ja pračytała, što biełaruskija nacyjanalisty vielmi žadajuć majoj śmierci. Ja dam im mahčymaść skazać mnie heta ŭ tvar».
Jana kaža, što syšła z atrada i zaraz pracuje adna. Jana kaža, što jaje brali ŭ pałon, ale «pazaŭčora skazali, što mianie zabili, heta nie tak. Na fota niejki miortvy chłopčyk».
Zaznačaje taksama, što byvała ŭ Kijevie, viedaje, dzie znachodzicca Viarchoŭnaja Rada — «vielmi dobraje dla mianie miesca». «Mianie nazvali terarystam i najomnikam, ja nie była najomnikam i terarystam… Baćka, mnie stać najomnikam i terarystam?», — pytajecca jana.
Jana taksama źviarnułasia da maci: «Mama, mnie vielmi škada, što tabie pryjšłosia pierajechać». Pryhraziła sajtu Chartyi'97 i «bieł-čyrvona-biełym tavaryšam». Pry kancy videa jana kaža, što źbirajecca ŭ Kijeŭ.
***
Nahadajem, što snajpierkaj z Barysava, jakaja vajuje na baku «apałčencaŭ», nazyvajuć Natallu Krasoŭskuju. U pačatku červienia jana raspaviała rasijskim žurnalistam, jak pačała vajavać u Słaviansku, i pieradała pryvitańnie asabista Łukašenku.
«Ja pryjechała siudy 5 maja. A 7 maja ja była ŭžo ŭ Słaviansku. Ja naradziłasia ŭ Biełarusi. Vyrasła ŭ Biełarusi. I da pryjezdu ŭ Słaviansk ja žyła ŭ Biełarusi, u Minskaj vobłaści, horadzie Barysaŭ, na vulicy Trusava. Ja nie bajusia pakazvać svoj tvar i pašpart», — pryznavałasia jana.
Raniej źjaŭlałasia infarmacyja ab tym, što Natallu kantuziła pad Słavianskam. Potym niekatoryja ŚMI pamyłkova paviedamili, što jaje zatrymali ŭkrainskija siłaviki, a 27 žniŭnia źjaviłasia infarmacyja, što jana zahinuła.
