Paśla zajavy ab «brydkaj knizie», u redakcyju TUT.BY źviarnuŭsia hienieralny dyrektar internet-kramy OZ.by Andrej Hrynievič, jaki raspavioŭ pra asartymientnuju palityku kampanii.
Nahadajem, 21 žniŭnia ŭ Twitter knižnaha internet-kramy OZ.by źjaviłasia paviedamleńnie z vybačeńniami za raźmiaščeńnie na sajcie prapanovy ab prodažy knihi Michaiła Palikarpava «Abarona Danbasa. Ihar Strałkoŭ — žach banderaŭskaj chunty». Paviedamleńnie źjaviłasia paśla rezanansu siarod karystalnikaŭ Bajnetu. U sacsietkach i na staroncy knihi na sajcie OZ.by jany aburalisia faktam raźmiaščeńnia i patrabavali źniać knihu z prodažu.
Jak akazałasia, supracoŭnik, jakija raźmiaścili paviedamleńnie, vykazaŭ svajo asabistaje mierkavańnie, vydaŭšy jaho za mierkavańnie kampanii.
«U apošni čas vakoł imia našaj kampanii razharelisia žarści. Pryčynaj pasłužyli vystaŭlenyja ŭ prodaž knihi na (vostruju i balučuju dla ŭsich nas) temu vajny va Ukrainie, a taksama niekarektnaje vykazvańnie ŭ sietcy adnaho z našych supracoŭnikaŭ, jaki vykazaŭ svajo asabistaje mierkavańnie, vydaŭšy jaho za mierkavańnie kampanii. Ja chaču prynieści ščyryja prabačeńni ŭsim, čyje pačućci byli zakranuty hetymi padziejami, i patłumačyć našu pazicyju», — rastłumačyŭ Andrej Hrynievič.
«Naša internet-krama nikoli nie była i nie budzie palityčnym prajektam. My nie padtrymlivajem tyja ci inšyja palityčnyja partyi i nie źjaŭlajemsia placoŭkaj dla vykazvańnia jakich-niebudź palityčnych punktaŭ hledžańnia. Naša dziejnaść nosić kamiercyjny charaktar i maje na zusim inšyja, adroznyja ad palityčnych, mety», — raspavioŭ hienieralny dyrektar internet-kramy.
Pavodle jaho słoŭ, internet-krama OZ.by — niejtralnaja handlovaja arhanizacyja, zadačaj jakoj — dać maksimalny vybar dla pakupnikoŭ.
«Našy klijenty sami farmujuć svaju pazicyju pa tych ci inšych pytańniach i vybirajuć, što kuplać abo nie kuplać», - adznačyŭ jon.
Jon taksama padkreśliŭ, što internet-krama realizuje knihi i inšuju pradukcyju, dazvolenuju zakanadaŭstvam Respubliki Biełaruś. Pra toje, što možna ci nielha pradavać na terytoryi krainy, prymajuć rašeńnie śpiecyjalnyja dziaržaŭnyja orhany.
«Na dumku OZ.by, nijakaja kniha nie moža być «kiepskaj», i tym bolš my nie pretendujem na rolu cenzaraŭ», - adznačyŭ Andrej Hrynievič.
Jon jašče raz vybačyŭsia ad imia OZ.by i paabiacaŭ, što ŭ klijentaŭ kramy budzie prava vybaru.
