Viečaram 25 žniŭnia ŭ centry Homiela byŭ zatrymany miascovy hramadski aktyvist Kanstancin Žukoŭski.
Padjechaŭšy na mašynie da svajho doma, jon ubačyŭ hruzavik, jaki pryparkavaŭsia tak, što pieraharadziŭ padjezd da varotaŭ doma Žukoŭskaha. Kiroŭcy hruzavika, jaki pracuje na budoŭli bližejšaha šmatkvaternaha doma, nie było ŭ kabinie, tamu Žukoŭski vyklikaŭ milicyju. Raniej žonka aktyvista prasiła rabotnikaŭ budoŭli pierastavić mašynu, adnak jany hetaha nie zrabili.
Na miesca incydentu prybyli supracoŭniki DAI i AMAP. Jany prapanavali Žukoŭskamu prajści ŭ słužbovuju mašynu DAI, adnak jon admoviŭsia, bajučysia taho, što budzie zatrymany, i paprasiŭ prynieści błank pratakoła ŭ jaho mašynu, dzie jon znachodziŭsia.
Adnak milicyjaniery zapatrabavali ad aktyvista pakazać pašpart, i, uziaŭšy jaho, nie addavali Žukoŭskamu, patrabujučy, kab jon prajšoŭ u słužbovuju mašynu. Paśla hetaha aktyvist zajechaŭ u svoj dvor, adnak za im pabiehli supracoŭniki AMAP.
Žukoŭski zapatrabavaŭ ad milicyjanieraŭ pakinuć jaho pryvatnuju terytoryju, ale jany praciahvali stajać u dvary i trymali adčynienymi dźviery mašyny Žukoŭskaha. Supracoŭniki AMAP i DAI praciahvali patrabavać, kab Žukoŭski prajšoŭ ź imi ŭ słužbovy aŭtamabil i sprabavali vyciahnuć aktyvista ź jaho mašyny.
Sprečka doŭžyłasia kala 20 chvilin, u vyniku supracoŭniki AMAP vyvieli Žukoŭskaha pad ruki z dvara, pasadzili ŭ svoj aŭtamabil i advieźli ŭ Centralny RAUS Homiela. Ciapier telefon aktyvista adklučany, ale jon paśpieŭ paviedamić BiełaPAN, što ŭ jaho zabrali ŭsie asabistyja rečy i majuć namier skłaści ŭ dačynieńni da jaho pratakoł za niecenzurnuju łajanku.
Paśla taho jak aktyvista zatrymali, supracoŭniki DAI apytvali kiroŭcu hruzavika, z-za jakoha i pačaŭsia incydent. Ci budzie składzieny pratakoł na kiroŭcu, supracoŭniki DAI nie paviedamili.
