Z pačatku hoda 90 žycharoŭ Mahiloŭskaj vobłaści pamierli ad atručvańnia ałkaholem. Heta na 9 čałaviek mienš, čym za anałahičny pieryjad 2013 h., paviedamiŭ prakuror Mahiloŭskaj vobłaści staršy savietnik justycyi Alaksandr Čadziuk.
Na dyspansiernym i prafiłaktyčnym ulikach ź sindromam zaležnaści ad ałkaholu i ŭžyvańnia ałkaholu sa škodnymi nastupstvami staić kala 30 tys. čałaviek.
«Niahledziačy na źmianšeńnie kolkaści złačynstvaŭ, učynienych hramadzianami ŭ stanie ałkaholnaha apjanieńnia, pa-raniejšamu bolš za čverć prypadaje na dolu asobaŭ u niećviarozym stanie, — adznačyŭ Alaksandr Čadziuk. — Ałkahol šmatkroć uzmacniaje ahresiju, prytuplaje ŭ čałavieka pačućcio adkaznaści, sparadžaje adčuvańnie ŭsiodazvolenaści i biespakaranaści».
Jak ličyć prakuror Mahiloŭskaj vobłaści, ałkahalizacyi nasielnictva spryjaje dastupnaść nabyćcia ałkaholnych napojaŭ, u pieršuju čarhu ŭnačy.
«Rašeńnie ab abmiežavańni realizacyi ałkaholnych napojaŭ u načny čas nie pryniata ŭ Biełarusi tolki na terytoryi Mahiloŭskaj i Homielskaj abłaściej, — padkreśliŭ Alaksandr Čadziuk. — Pry hetym handal ałkaholnaj pradukcyjaj paśla 22.00 u vobłaści ažyćciaŭlajuć 109 kram, najbolšaja kolkaść jakich raźmieščana ŭ Babrujsku — 36, Mahilovie — 21 i Asipovickim rajonie — 12. Vosiem handlovych abjektaŭ z kruhłasutačnym režymam pracy i pravam realizacyi ałkaholnych napojaŭ nočču znachodziacca na terytoryi AZS».
Z pačatku hoda ŭ Mahiloŭskaj vobłaści kanfiskavana 68 samahonnych aparataŭ, pryciahnuty da administracyjnaj adkaznaści za parušeńnie antyałkaholnaha zakanadaŭstva amal 1 tys. hramadzian.
