Reaktar dla pieršaha enierhabłoka Biełaruskaj AES budzie pastaŭleny na stancyju ŭ kancy 2015 hoda, paviedamlaje mašynabudŭničy dyvizijon dziaržaŭnaj karparacyi «Rosatam» AAT «Atamenierhamaš».
«U miežach kantrakta kampanija vyrabić i pastavić na Biełaruskuju AES abstalavańnie dla dvuch błokaŭ Biełaruskaj AES. Pryčym pieršy reaktar kampanija pastavić užo ŭ kancy 2015 hoda», — cytuje pres-słužba kampanii hienieralnaha dyrektara AAT «AEM-technałohii» Jaŭhiena Pakiermanava.
Ciapier u Vałhadonskim filijale AAT «AEM-technałohii», jakoje ŭvachodzić u «Atamenierhamaš», ažyćcioŭlena zborka vierchniaha paŭkorpusa reaktara dla błoka № 1, paśla čaho pradpryjemstva pačnie aŭtamatyčnuju zvarku kalcavych švoŭ. Na apošniaj stadyi vyrabu znachodziacca ŭnutrykarpusnyja pryłady reaktara (šachta, vyharadka, błok abarončych trub).
Pavodle słoŭ Pakiermanava, letaś na Biełaruskuju AES była pastaŭlena pryłada łakalizacyi raspłavu dla błoka № 1, a ŭ pačatku žniŭnia adhružana pryłada łakalizacyi raspłavu dla błoka № 2.
Asnoŭnymi pastaŭščykami zahatovak dla vyrabu namienkłatury vystupajuć PAT «Enierhamašśpiecstal» (Kramatorsk, Ukraina, taksama ŭvachodzić u «Atamenierhamaš») i AAT «Ižorskija zavody» (Sankt-Pieciarburh).
Budaŭnictva atamnaj elektrastancyi na Astravieckaj placoŭcy ŭ Hrodzienskaj vobłaści pačałosia ŭ 2011 hodzie. Pieršy błok stancyi płanujecca ŭvieści ŭ ekspłuatacyju ŭ 2018 hodzie, druhi — u 2020-m. Sumarnaja mahutnaść dvuch enierhabłokaŭ składzie kala 2,4 tys. MVt.
