Z-za chraničnych finansavych prablem adsutnaści zarpłaty ŭsie hulcy futbolnaha kłuba pieršaj lihi «Rečyca 2014» (były «Viedryč-97») napisali zajavy ab sychodzie, paviedamiŭ hałoŭny trenier kamandy Alaksandr Brazievič u zvarocie da balelščykaŭ.
«Na hety momant situacyja takaja, što na stale ŭ dyrektara lažać zajavy na zvalnieńnie ad usich futbalistaŭ kamandy. Hulcy admovilisia treniravacca. Całkam vierahodna, što chłopcy admoviacca jechać na matč 1/16 Kubka Biełarusi suprać «Hranita», — zaznačyŭ nastaŭnik.
Pavodle jaho słoŭ, kali da kanca tydnia nie budzie nijakich zruchaŭ, usie futbalisty syduć. «Ja prosta nie zmahu ich utrymać. Kali ja zaraz naabiacaju, što ŭsio budzie dobra, a praz dva tydni i ministerstva, i haradskija ŭłady admoviać u dapamozie, jak mnie hladzieć u vočy chłopcam?» — rastłumačyŭ Brazievič.
Futbolny kłub znachodzicca ŭ «vielmi ciažkaj situacyi», kanstatavaŭ jon. Kamanda nie maje prava atrymlivać dziaržaŭnuju padtrymku, «pakolki Ministerstva sportu admaŭlajecca padpisvać naš płan raźvićcia». Uvieś pieršy kruh kłub žyŭ tolki na ŭłasnyja zaroblenyja srodki.
«Ministerstva sportu adnojčy prysłała nam list z admovaj. Pryčynaj źjaŭlałasia toje, što «Rečyca 2014» — heta nie novy kłub. Tam było skazana, što hulcy i ŭvieś piersanał «Viedryča-97» prosta zajavilisia pad novaj nazvaj. A pakolki «Viedryč-97» letaś nie zarabiŭ 20% ad ułasnaha biudžetu, h.zn. nie vykanaŭ ukaz prezidenta № 191, u dziaržpadtrymcy na nastupny siezon jamu admoŭlena», — paviedamiŭ hałoŭny trenier, padkreśliŭšy, što FK «Rečyca 2014» — novaja jurydyčnaja asoba, zarehistravanaja ŭ pačatku 2014 hoda.
«Na hetym tydni Ministerstva sportu pavinna pryznačyć datu pasiadžeńnia, na jakim buduć vysłuchany pradstaŭniki našaha kłuba. Ja vielmi spadziajusia, što ćviarozy sens pieramoža i płan budzie padpisany… Ale kali ministerstva znoŭ admović, to pavinien być płan «B». Hetym płanam ja baču dapamohu z boku miascovych uładaŭ… Niaŭžo my horšyja? Niaŭžo ŭ Rečycy nie znojducca hrošy dla vyratavańnia adzinaha spartyŭnaha kłuba ŭ horadzie?» — havorycca ŭ zvarocie.
Finansavyja prablemy źviedvajuć i inšyja kłuby, u tym liku vyšejšaj lihi. Da prykładu, 20 lipienia futbalisty žodzinskaha «Tarpieda-BiełAZa» vyjšli ŭ majkach z nadpisam «Ci patrebny futboł u Žodzinie?»
