Sajt kazak.by paviedamlaje, što ad 3 da 6 lipienia pad Minskam prajšli zbory, arhanizavanyja vajskova-patryjatyčnym centram «Kazačy Spas» i hramadskim abjadnańniem «Horad biez narkotykaŭ». Meta zboraŭ — vajskova-patryjatyčnaje vychavańnie moładzi ŭ krainie.
U zborach uziali ŭdzieł 47 čałaviek: kazaki ź Minska, Mahilova, Žodzina, Hancavičaŭ, Drahičyna. Na fatazdymkach bačna, što bolšaść ź ich — padletki.
Udzielniki zboraŭ vyvučali narychtoŭvańni da stralby z aŭtamata, miedycynskuju padrychtoŭku, tapahrafiju, alpinisckuju padrychtoŭku, taktyku, armiejski rukapašny boj, stralbu pa mišeniach ź pistaleta i inšyja vajskovyja dyscypliny.
Aproč tearetyčnych zaniatkaŭ, u prahramie letnika paznačanyja i praktyčnyja treniroŭki.
Juryst Pavał Sapiełka patłumačyŭ, što vykarystańnie sapraŭdnaj strałkovaj zbroi niezakonnaje, kali mierapryjemstva nie supravadžajecca supracoŭnikami vajskovaj čaści abo milicyjantami, i adznačyŭ, što ŭ Biełarusi dzieci-kazaki svabodna mohuć atrymlivać vajskovuju padrychtoŭku, u toj čas jak siabry nacyjanalnych arhanizacyjaŭ nie mohuć pravieści zvyčajny letnik — ich zatrymlivajuć i, byvaje, sudziać: «Tut składana dać vyčarpalny kamentar što da zakonnaści vykarystańnia zbroi dla takoha mierapryjemstva, tamu što niama ŭsioj infarmacyi pra toje, jak adbyvalisia hetyja zbory. U nas aŭtamatyčnaja zbroja va ŭłasnaści hramadzianaŭ, hetaksama jak i hramadskich arhanizacyjaŭ, znachodzicca nie moža. Tamu kali ŭ hety letnik nie byli zaanhažavanyja vajskovyja čaści abo milicyja, to karystańnie aŭtamatyčnaj strałkovaj zbrojaj niezakonnaje.
Ale tut paŭstaje inšaje, bolš važnaje pytańnie — vybarny padychod ułady da takich trenirovak. Kali b niejkija nacyjanalna aryjentavanyja arhanizacyi, jakija taksama pieraśledujuć patryjatyčnyja mety, pasprabavali b arhanizavać navat nie vajenizavany, a prosta spartovy letnik, to jany b sutyknulisia ź vialikaj kolkaściu prablemaŭ, až da zatrymańnia».
Staršynia Partyi BNF Alaksiej Janukievič ličyć, što patryjatyčnaje vychavańnie moładzi — heta dobra, ale važna, u supravadžeńni jakoj ideałohii jano adbyvajecca:
«Navučyć maładoha čałavieka stralać z aŭtamata Kałašnikava nieskładana. Pytańnie ŭ tym, jak jon budzie vykarystoŭvać hetyja viedy. U mianie jość vialikija sumnievy, što kazackija arhanizacyi vychoŭvajuć u moładzi pačućcio patryjatyzmu da Biełarusi i addanaść biełaruskaj ziamli. Kali ideałohija, jakuju raspaŭsiudžvajuć kazackija arhanizacyi, nie adpaviadaje nacyjanalnym intaresam Biełarusi, takija letniki niasuć nadzvyčaj vialikuju niebiaśpieku, bo na ich rychtujucca patencyjnyja zdradniki Biełarusi, jakija, majučy ideałahična apracavany rozum i navyki ŭzbrojenaha supraćstajańnia, mohuć stacca instrumientam umiašańnia Rasii va ŭnutranyja spravy Biełarusi».
Alaksiej Janukievič taksama źviarnuŭ uvahu na toje, što, naprykład, letniki Moładzi BNF nieadnarazova razhanialisia, a ich udzielniki navat traplali na łavu padsudnych.
«Adsutnaść reakcyi z boku biełaruskich pravaachoŭnych orhanaŭ aburaje. Asabliva z ulikam taho, što lubyja letniki, dzie b mahło być nacyjanalna-patryjatyčnaje vychavańnie biez anijakich prykmietaŭ vajskovaj padrychtoŭki, zaŭsiody zabaraniajucca i razhaniajucca. Niaredka ŭdzielnikaŭ takich letnikaŭ zatrymlivajuć.
Na maju dumku, heta niedapuščalna i vymahaje nieadkładnaj reakcyi z boku pravaachoŭnych orhanaŭ, kali, viadoma, hetyja orhany abaraniajuć nacyjanalnyja intaresy i biełaruski zakon».
