My, vykładčyki Jeŭrapiejskaha humanitarnaha ŭniviersiteta i zakonna abranyja čalcy Sienata EHU, atrymali z aficyjnaj elektronnaj adresy prarektara pa akademičnych pytańniach Alaksandra Kałbaski zapyt nastupnaha źmiestu (pierakład z anhielskaj):
«Paśla vyvučeńnia vašaj zajavy na zamiaščeńnie pasady ŭ Jeŭrapiejskim humanitarnym univiersitecie było b vielmi pažadana rastłumačyć šerah pytańniaŭ, jakija paŭstali, kab padać našyja rekamiendacyi rektaru z nahody pryznačeńnia. Vy nieadnarazova demanstravali pryncypovuju niazhodu z najaŭnym kursam i rašeńniami ŭniviersiteta. Heta rabiłasia jak u piśmovaj formie, tak i ŭ publičnych zajavach, dla zacikaŭlenych asob va ŭniviersitecie i za jahonymi miežami.
Z ulikam hetych zajaŭ, naturalna, uźnikaje pytańnie: čamu vy žadajecie pracavać va ŭstanovie, ź jakoj u vas istotnyja roznahałośsi i čyj kurs vy nie padtrymlivajecie? Kali łaska, apišycie bolš dakładna dla kamisii pa najmie vašaje bačańnie taho, jak vy možacie i žadajecie pracavać na karyść i sadziejničać realizacyi misii i kursu univiersiteta jak cełasnaj arhanizacyi pad kiraŭnictvam orhanaŭ kiravańnia univiersitetam.
Z padziakaj za vaš adkaz,
kamisija pa najmańni prafiesarska-vykładčyckaha składu».
U hetaj suviazi chočam zajavić nastupnaje:
1. My nie padavali nijakich zajavaŭ na zamiaščeńnie pasady. Ciapier idzie raźmierkavańnie nahruzki, jakaja zastałasia paśla adkrytaha konkursu. Hetaja pracedura praduhledžvaje prapanovu supracoŭnictva z boku ŭniviersiteta, a nie spabornictva zajavaŭ achvotnych papracavać.
2. U svaim liście administracyja EHU faktyčna pryznajecca ŭ palityčnaj matyvacyi ŭłasnych kadravych rašeńniaŭ. Hetyja dziejańni my rasceńvajem jak adkryty cisk na niazhodnych z kursam kiraŭnictva. EHU — nie tolki administracyja. Heta, u pieršuju čarhu, akademičnaja supolnaść. My majem prava nie pahadžacca z palitykaj top-mieniedžmientu, kali jana supiarečyć statutu univiersiteta i inšym zakonam, jakija rehulujuć śfieru vyšejšaj adukacyi. Bieź pierśpiektyvy pahroz, dyskryminacyi abo zvalnieńnia.
3. Z univiersiteta paśladoŭna vyciskajucca demakratyčnyja aktyvisty. Užo na stadyi papiaredniaha raźmierkavańnia nahruzki na nastupny navučalny hod zastajucca biez pracy sienatary ad demakratyčnaj płatformy i čalcy Rady prafsajuza vykładčykaŭ i supracoŭnikaŭ EHUnion Andrej Łaŭruchin i Andrej Ralonak, namieśnik staršyni prafsajuza Kanstancin Tkačoŭ. Raniej byŭ daterminova zvolnieny staršynia Sienata prafiesar Pavieł Cieraškovič.
4. Padmiena acenki prafiesijanalizmu pravierkaj na łajalnaść nie maje ničoha supolnaha ni z «baraćboj za jakaść vykładańnia», ni z pracoŭnym zakanadaŭstvam Litvy, ni z akademičnymi svabodami.
5. Na našu dumku, začystka ad inšadumcaŭ u imia kiravanaj źvierchu stabilnaści zvodzić na nul razrekłamavanuju misiju EHU jak «vostrava svabody» i stavić pad pytańnie jahonuju efiektyŭnaść jak adukacyjnaha prajekta.
Dla abarony svaich zakonnych pravoŭ my majem namier vykarystoŭvać usie lehalnyja srodki, uklučna sa zvarotam u sud. Dva sudovyja pracesy ŭ suviazi sa svaimi niadaŭnimi dziejańniami kiraŭnictva EHU ŭžo atrymała.
Maksim Žbankoŭ, kandydat fiłasofskich navuk, dacent, sienatar EHU (8 hadoŭ pracy ŭ EHU),
Alaksiej Kryvałap, kandydat kulturałohii, sienatar EHU (13 hadoŭ pracy ŭ EHU),
Volha Šparaha, kandydat fiłasofskich navuk, dacent, namieśnica staršyni Sienata EHU (13 hadoŭ pracy ŭ EHU).