Adzin ź lideraŭ kałumbijskaj paŭstanckaj «Armii nacyjanalnaha vyzvaleńnia» (ANV) Alfreda Hansales apynuŭsia ŭ naručnikach praz svaju žarść da futboła, paviedamlaje kałumbijskaje vydańnie El Tiempo.
30-hadovy Hansales abstalavaŭ śpiecyjalnuju zału dla prahladu čempijanatu na adnoj ź vił u rajonie Mina-Prajekta (departamient Balivar). Jon zamoviŭ spadarožnikavuju antenu i arhanizavaŭ zavoz ŭ dom pravizii i śpirtnoha na niekalki dzion, choć zvyčajna ŭ adnym miescy bolš za sutki nie zastavaŭsia.
Ale adzin z bajevikoŭ, jaki ŭdzielničaŭ u achovie doma, zdaŭ palicyjantam adras viły, dzie Hansales budzie hladzieć pieršyja matčy čempijanatu. «Hansales zamaŭlaŭ dla siabie darahija likiory, vytančanuju ježu, da jaho pryvozili žančyn», — z abureńniem raskazvaje bajavik. Na asnovie jaho pakazańniaŭ ŭłady raspracavali śpiecyjalnuju apieracyju z udziełam śpiecpadraździaleńniaŭ palicyi i vajskovych sił. Pry zatrymańni Hansales supracivu nie akazaŭ.
ANV — druhaja pa sile partyzanskaja hrupoŭka ŭ krainie paśla «Revalucyjnych uzbrojenych sił» (RUSK). U ANV kala 2,5 tysiačy bajcoŭ. Jak i RUSK, ANV uklučana ZŠA i ES u śpis terarystyčnych arhanizacyj.
Hansales maje mianušku «Adnaruki», bo straciŭ levuju ruku.
Padraździaleńnie paŭstancaŭ, jakim kamandavaŭ Hansales, zajmałasia vykradańniem ludziej i kantralavała ŭ departamiencie Balivar nielehalnuju zdabyču zołata. Paŭstancy Hansalesa brali ź nielehalnych zołatazdabytčykaŭ da 60% vypracoŭki. Miascovaja presa paviedamlaje, što adna nielehalnaja zołatazdabyŭčaja šachta moža dać u miesiac da 23 kiłahramaŭ zołata.
