Napačatku pracesii prajšła Śviataja Imša ŭ kaściole Najśviaciejšaj Trojcy (sv. Rocha) na Załatoj horcy − zatym pracesija prypyniłasia na Płoščy Pieramohi − Kastryčnickaj płoščy i la Čyrvonaha kaścioła. Zavieršyłasia pracesija kala archikatedry. U pracesii ŭziali ŭdzieł ad 3000 da 4000 viernikaŭ.
U liturhii ŭdzielničali Mitrapalit Minska-Mahiloŭski arcybiskup Tadevuš Kandrusievič, Apostalski vizitatar dla hreka-katolikaŭ Biełarusi archimandryt Siarhiej Hajek, śviatary i vierniki Minska.
Pracesija Božaha Cieła — eŭcharystyčnaja pracesija z nahody ŭračystaści Najśviaciejšaha Cieła i Kryvi Pana. Jana prachodzić zvyčajna navokał kaścioła ci pa vulicach horada i zatrymlivajecca kala čatyroch ałtaroŭ, dzie čytajucca ŭryŭki ź Jevanhiella i pramaŭlajucca hamilii. U hetym hodzie ŭračystaść Najśviaciejšaha Cieła i Kryvi Pana adznačajecca 19 červienia.
Va ŭračystaść Božaha Cieła Kaścioł składaje padziaku Zbaŭcu za dar pryčaścia.
Śviatkavańnie ŭračystaści Božaha Cieła było ŭviedziena ŭ XII stahodździ paśla abjaŭleńniaŭ błasłavionaj Julijanie (1193–1258 hh.),
nastajacielnicy klaštara aŭhustynak, jaki znachodziŭsia pad Lježam (Bielhija). Jość mierkavańni, što ŭpieršyniu pracesija była praviedziena ŭ Kiolnie (Hiermanija). Ź ciaham času śviata pačało nabirać papularnaść, i ŭ 1264 hodzie papa Urban IV ustanaviŭ śviata Corpus Christi (Božaha Cieła) va ŭsim Kaściole.
