14 śniežnia 1993 hoda škłoŭski deputat vybuchnuŭ infarmacyjnaj bombaj i pačaŭ svaju pieršuju prezidenckuju kampaniju, paviedamlaje «Jeŭraradyjo».
20 hadoŭ tamu, 14 śniežnia 1993 hoda, Alaksandr Łukašenka ŭpieršyniu prasłaviŭsia na ŭsiu krainu, vystupiŭšy ŭ parłamiencie sa skandalnym antykarupcyjnym dakładam. Pačynaŭ vielmi ramantyčna i patryjatyčna.
«Z takoj spustošanaściu ŭ dušy ad taho, što adbyvajecca ŭ dziaržavie, ad biaźmiežža. Z tryvohaj za losy dziaržavy i jaje hramadzian», — havoryć budučy pieršy i pakul adziny prezident Biełarusi.
Vystup deputata Łukašenki tranślujecca pa telebačańni, a praz dva dni drukujecca ŭ «Narodnaj haziecie», zaniaŭšy cełyja try pałasy. Heta pieršaja ŭ najnoŭšaj historyi Biełarusi infarmacyjnaja bomba. Nastolki vybuchovaja, što tahačasny kiraŭnik krainy Stanisłaŭ Šuškievič praź dzień traplaje ŭ špital z hipiertaničnym kryzam.
A pra «advažnaha i biasstrašnaha» Łukašenku havorać na kuchniach i ŭ čerhach. I ŭsiaho praz paŭhoda vybirajuć prezidentam zamiest zapłanavanaha Kiebiča. Jak jaho było nie vybrać, kali deputat Łukašenka vykryŭ usie zahany ŭłady? Naprykład, raskazaŭ pra pryhretyja miescy dla… synoŭ asobnych viertykalščykaŭ.
«I lubiačy tata (namieśnik kiraŭnika Hrodzienskaha abłvykankama Hiruć. — Jeŭraradyjo) dapamoh synočku i z pamiaškańniem dla ofisa, i z haražom, i z kredytami. Adnak vyhadavany ŭ duchu novaha myśleńnia Hiruć-małodšy vytvorčaściu zajmacca nie staŭ, a skancentravaŭ usiu svaju kipučuju enierhiju na pasiarednictvie i handlova-zakupačnaj dziejnaści».
Takich prykładaŭ Łukašenka ŭ svaim dakładzie pryvodzić adrazu niekalki. Vielmi ŭžo nie padabałasia škłoŭskamu deputatu zvyčka čynoŭnikaŭ pryhravać svaich synoŭ i dačok. Akramia taho, Łukašenka ŭ 1993 hodzie jarasna krytykuje samu sistemu, što paradziła karupcyju i finansavyja złačynstvy. Pryčyny hetaha, na dumku maładoha Łukašenki, u… dziaržaŭnaj manapolii, inflacyi i «adsutnaści jasnaści z valutaj».
«Umovy dla raznastajnych finansavych złoŭžyvańniaŭ — unikalnyja. Tavarnaja vytvorčaść — manapolija dziaržavy, a absłuhoŭvaje jaje sistema kamiercyjnych bankaŭ. I jašče, naturalna, inflacyja i adsutnaść jasnaści z valutaj i datavanyja košty».
Dobra znajomaja sučasnaj Biełarusi karcina. Tolki vystupić z antykarupcyjnym dakładam bolš niama kamu.
U antykarupcyjnym dakładzie deputata Łukašenki šmat proźviščaŭ. Bolšaść užo zabytyja, času prajšło šmat. Ale jość i znajomyja. Možna sustreć, u pryvatnaści, navat proźvišča… Miaśnikoviča. U 1993 hodzie Łukašenka abvinavačvaŭ jaho ŭ pratekcyi ministru finansaŭ. Maŭlaŭ, jaho niezakonna ŭklučyli na chlebnuju pasadu ŭ saviecie «Biełźniešekanombanka».
«Jak vyśvietliłasia, ministra (finansaŭ. — zaŭv. Jeŭraradyjo) Jančuka ŭpaŭnavažyŭ pravam uvajści ŭ saviet pieršy namieśnik kiraŭnika Saŭmina Michaił Miaśnikovič… Takija dziejańni — heta parušeńnie zakona… Dalej, jak havorycca, jechać niama kudy».
Jak akazałasia — jość kudy. Za dvaccać hadoŭ Michaił Miaśnikovič nie tolki nie pabyvaŭ za kratami za «parušeńnie zakona», ale navat zrabiŭsia premjer-ministram, dzie niadrenna pačuvajecca i zaraz.
Prajšoŭsia budučy prezident i pa apazicyjanierach. Abvinavaciŭ u vałodańni inšamarkami i ŭ zamiežnym finansavańni. Deputat ad BNF Siarhiej Navumčyk navat byŭ vymušany apraŭdvacca ŭ toj samaj «Narodnaj haziecie».
«Inšamarki. Tak, u deputata Navumčyka i deputata Zabłockaha jość inšamarki. Ale hetym inšamarkam pa 15 hadoŭ… Ja z usioj adkaznaściu kažu — nijakija zamiežnyja fondy, u tym liku i našy, apazicyju nie finansujuć. Ja padkreślivaju: nijakija zamiežnyja fondy apazicyju BNF nie finansujuć, ni kapiejki, ni centa».
Praz 20 hadoŭ Navumčyk rehularna adkazvaje svaim apanientam u «Fejsbuku», a na inšamarcy jeździć užo sam Łukašenka. Havoryć, što na padoranaj.
Tym nie mienš jość u antykarupcyjnym dakładzie Łukašenki i takoje, što siońnia padajecca sapraŭdnaj fantastykaj. Voś, naprykład, historyja pra karupcyju na Minskim aŭtazavodzie:
«Da kryminalnaj adkaznaści pryciahvajucca dva kiraŭniki vytvorčych padraździaleńniaŭ MAZa, jakim davali chabar za pazačarhovy prodaž hruzavikoŭ…».
Viasiołyja byli časy dla Minskaha aŭtamabilnaha zavoda. Zaraz jaho markietołahi sami stajać u čarzie pa pakupnikoŭ.
