Karespandent ukrainskaj redakcyi radyjo «Svaboda» pabyvała minułaj nočču za kulisami kuchni Jeŭramajdanu.
Zapasy krupaŭ i makarony na kalidory.
Chłopcy koluć arechi.
Luboŭ Ściapanaŭna na piensii. Na kuchni Jeŭramajdanu jana štodnia — praviaraje ŭsie pradukty na termin prydatnaści i jakaść. Adkazvaje za čyściniu i zachavańnie sanitarnych normaŭ.
Hrafik charčavańnia abaroncaŭ Majdanu.
Akno razdačy.
Stałovaja Doma prafsajuzaŭ — asnoŭnaja kuchnia Jeŭramajdanu. Siudy znosiać pradukty, jakija pryvoziać ludzi, tut ich sartujuć i rychtujuć ź ich ježu dla mitynhoŭcaŭ — dvojčy ŭ dzień novyja haračyja stravy i amal uvieś čas — buterbrody, čaj, kava. Zachodzić starońnim siudy nielha — sanitarnaja zona.
Tut dniom i nočču pracujuć dziaŭčaty, žančyny — usie vałanciory. Im razdajuć śpiecyjalnuju vopratku i humovyja palčatki. Vałasy padabranyja. Padłohu myjuć časta. Śpiavajuć ukrainskija narodnyja pieśni.
Apazicyjnyja štaby zabiaśpiečvajuć kuchniu bazavymi rečami — vadoj, chlebam, posudam.
Praduktovyja zapasy Jeŭramajdanu papaŭniajuć u asnoŭnym nieabyjakavyja ŭkraincy — jany i farmirujuć štodzionnaje mieniu mitynhoŭcaŭ.
Z haračych straŭ — sasiski, bulba, kašy, krupy. Ale hałoŭnaja pravizija — heta buterbrody. Ich dziaŭčaty robiać niaspynna.
Luboŭ Ściapanaŭna 25 hadoŭ pracavała ŭ sanepidstancyi na ŭkrainskaj čyhuncy. Ciapier jana na piensii. Na kuchni Jeŭramajdanu jana štodnia — praviaraje ŭsie pradukty na termin prydatnaści i jakaść. Adkazvaje za čyściniu i zachavańnie sanitarnych normaŭ. Viadoma — dobraachvotna.
«Byvaje, ludzi prynosiać toje, što nielha hatavać u takich umovach. My nie prapuskajem liviernyja kaŭbasy, piačonačnyja paštety, nijakich hryboŭ.
Byvaje, niasuć vialenuju rybu, kryvianuju kaŭbasu — heta nielha. Usie stravy, kali ich padrychtavali doma, my staranna praviarajem i nie zaŭsiody padajem ludziam, tamu što jany chutka psujucca.
Hałubcy, naprykład, spačatku padviarhajucca dadatkovaj termičnaj apracoŭcy. Kłapocimsia ab tym, kab nie dapuścić nijakich atručvańniaŭ», — kaža Luboŭ Ściapanaŭna. Da jaje ŭsie prysłuchoŭvajucca. Zapasy charčoŭ ź pieršaha pohladu ŭražvajuć. Jany aktyŭna papaŭniajucca, zrešty, hetak ža chutka i razychodziacca.
La akienca vydačy — čarha. Heta taksama vałanciory, roznaha połu i ŭzrostu. Ich praca — vynosić pryhatavanuju dziaŭčatami ježu i napoi na padnosach na vulicu da punktaŭ razdačy na płoščy Niezaležnaści, a taksama adnosić ŭ bolš addalenyja «revalucyjnyja dysłakacyi» — naprykład, pad Administracyju prezidenta. Ratacyja bieśpierapynnaja.
Dziaŭčyna z hučnahavarycielem kiruje pracesam i paviedamlaje apošnija naviny z vulicy. «Ludziej značna bolš», «Na scenie — Ciahnibok», «Dla administracyi bolš buterbrodaŭ nie rabicie — tam kažuć, što sytyja».
Praca kipić. Dziaŭčaty narazajuć buterbrody, sadavinu i ŭvieś čas śpiavajuć ukrainskija narodnyja pieśni. Praces zamiraje tolki na imhnieńnie — kuchnia vykonvaje ŭkrainski himn. Potym — malitva. I znoŭ za pracu.