Novaja kropka bifurkacyi ŭ stylistycy national-fusion. Na vulicy Karła Marksa adčyniajecca bar «Tutejšyja» ź nievysokimi koštami i źnižkami dla biełaruskamoŭnych.
Naprykancy hoda ŭ Miensku adčyniajecca novaja placoŭka. Bar «Tutejšyja» raźmieścicca pa adrasie vuł. Karła Marksa, 21 (susiednija dźviery ź piceryjaj «Pierčyk»). Adčyniajuć miesca našyja staryja znajomyja z prajektu CoffeeLab – za biźniesovy składnik adkazvaje Arciom, za ideałahična-dyzajnierski – Uładzimir aka Mrrr.
Azdableńnie interjera – u kancepcyi national-fusion, z kupaj simvałaŭ: ad viaskovych hlinianych žbanoŭ i elemientaŭ rycarskaj amunicyi da stosu haziet «Praŭda» i baksiorskich palčatak.
«Pry raspracoŭcy dyzajnu natchnialisia ŭ tym liku stylistykaj apošnich klipaŭ «Lapisa»», – tłumačyć Mrrr.
Na ścianie – vialiki stensił z partretami piaci biełaruskich litarataraŭ. Siarod ich navat Maksim Tank (na pytańnie «čamu mienavita jon?» my pačuli adkaz «a čamu b i nie?»).
Nazva bara «Tutejšyja», vidavočna, budzie vyklikać pytańni ŭ ludziej z hłybokim pačućciom nacyjanalnaj hodnaści. Na heta stvaralniki miesca zahadzia adkazvajuć: «Nazva davoli iraničnaja, kali žadajecie. Nie chvalujciesia, pjesu Janki Kupały my čytali. Budziem ličyć naš bar takoj kropkaj identyfikacyi. Chaj ludzi da nas prychodziać i vyznačajucca, chto jany – tutejšyja ci biełarusy».
U «Tutejšych» budzie pradavacca 2–3 vidy raźliŭnoha piva i bolš za 20 – butelečnaha, u tym liku češskaha, niamieckaha, bielhijskaha.
Kielich budzie kaštavać u siarednim Br 30–35 tys. Abiacajuć taksama «šyroki vybar mocnaha ałkaholu, u tym liku vialikuju liniejku viski». Stvaralniki miesca majuć bekhraŭnd u vyhladzie kaviarni CoffeeLab, tamu i ŭ novym miescy vialikaja ŭvaha budzie nadavacca kavavym napojam.
Stvaralniki bara padkreślivajuć, što buduć rabić minimalnuju nacenku na ałkahol, kavu i zakuski, tamu miesca pahražaje zrabicca adnym z samych niedarahich u hetym dystrykcie. «My raźličvajem na maładuju publiku, studentaŭ, umoŭna kažučy, voś na tuju aŭdytoryju, jakaja niadaŭna zapałaniła Vilniu z nahody kancertu «Lapisaŭ»», – kaža Arciom.
U mieniu nie budzie haračych stravaŭ, ale buduć sałaty, sendvičy, piŭnyja sety.
Płanujecca zrabić liniejku śniadankaŭ. Miesca budzie adčyniacca a 9-j ranicy, a toje, da jakoj hadziny buduć pracavać «Tutejšyja», pakul jašče vyrašajecca.
Akramia, vidavočna, napojaŭ i snekaŭ, u bary płanujecca zrabić vitrynu ź cikavymi suvienirami, tyšotkami i, mahčyma, navat knihami, jakija tut možna budzie prydbać. Nu i adna z hałoŭnych fišačak – chłopcy abiacajuć źnižku 15% usim, chto budzie va ŭstanovie razmaŭlać pa-biełarusku. «A čamu b i nie?» – čujecca ŭ adkaz na pytańnie, adkul pryjšła takaja ideja.
Da kanca hoda miesca budzie pracavać u testavym režymie (i pakul, chutčej za ŭsio, tolki z kavaj i zakuskami), ale na raźviedku zahlanuć možna ŭžo z nastupnaha tydnia.
