Sustaršynia mižnarodnaha hramadskaha abjadnańnia «Małady front» (Čechija), były palitviazieńŹmicier Daškievič papiaredžany ab mahčymym praciahu i ŭzmacnieńni žorstkaści previentyŭnaha nahladu.
«Kožny pieršy, treci i čaćviorty čaćvier miesiaca ja chadžu adznačacca va UUS Pieršamajskaha rajona Minska.
Siońnia (5 śniežnia) inśpiektar uručyŭ mnie pastanovu, u jakoj havorycca, što kali ja budu i dalej akazvać supraciŭleńnie supracoŭnikam milicyi, previentyŭny nahlad u dačynieńni da mianie budzie praciahnuty i stanie bolš žorstkim», — zajaviŭ Daškievič.
6 listapada palityk byŭ aryštavany na troje sutak za niepadparadkavańnie milicyi. U toj dzień kala staličnaha HUMa jon źbiraŭ podpisy za viartańnie vulicy Lenina jaje histaryčnaj nazvy — Francyskanskaja i byŭ zatrymany supracoŭnikami pravaachoŭnych orhanaŭ. U sudzie vystupili dvoje śviedak-milicyjanieraŭ, jakija zajavili, što Daškievič «upiraŭsia, sadziŭsia na ziamlu i nie padparadkoŭvaŭsia ich zakonnym patrabavańniam».
Paśla ŭručeńnia papiaredžańnia palityk, pavodle jaho słoŭ, zajaviŭ inśpiektaru, što byŭ asudžany na padstavie sfalsifikavanaha pratakoła.
Pastanovu Pieršamajskaha RUUS Daškievič rasceńvaje jak «praciah kursu na pieraśled inšadumcaŭ».
28 žniŭnia Daškievič vyjšaŭ na volu z hrodzienskaj turmy № 1 paśla amal trochhadovaha źniavoleńnia. Jon byŭ aryštavany napiaredadni apošnich prezidenckich vybaraŭ, 18 śniežnia 2010 hoda, i asudžany spačatku za «asabliva złosnaje chulihanstva», a zatym za «złosnaje niepadparadkavańnie patrabavańniam administracyi papraŭčaj ustanovy».
Pad previentyŭnym nahladam Daškievič budzie znachodzicca na praciahu paŭhoda paśla vyzvaleńnia.
Jamu zabaroniena pakidać miesca žycharstva z 20 da 6 hadzin.
