Adzin z 15 finalistaŭ nacyjanalnaha adboračnaha tura konkursu «Jeŭrabačańnie-2014» Alaksiej Hros admoviŭsia ad udziełu ŭ konkursie.
Jak paviedamlaje TAA «Vebmiuzik Pablišynh», u adboračnym tury Hros vykonvaŭ pieśniu bielhijskaha kampazitara Marka Paelinka If I could do it all again. U 2012 hodzie pravy na hetuju kampazicyju byli ŭstuplenyja Paelinkam pradziusarskamu centru «Spamaš», ź jakim supracoŭničaje vykanaŭca, adnak niekalki dzion tamu vyśvietliłasia, što pieśnia raniej užo vykonvałasia inšym artystam. Pakolki heta supiarečyć praviłam konkursu, Hros adklikaŭ svaju zajaŭku na ŭdzieł u adboračnym tury «Jeŭrabačańnia-2014».
«Hetaja kampazicyja źjaviłasia ŭ maim repiertuary pryblizna hod tamu. Pieśniu nidzie nie vykonvaŭ — biaroh dla adboru na «Jeŭrabačańnie-2014». Dla mianie i ŭsioj kamandy pradziusarskaha centra «Spamaš» fakt, što pieśnia ŭžo była kimści vykanana, biezumoŭna, staŭ niepryjemnaj niečakanaściu», — zaznačyŭ Hros.
Pavodle jaho słoŭ, centr maje namier razabracca ŭ pryčynach taho, što zdaryłasia. Sam vykanaŭca płanuje ŭziać udzieł u adbory na «Jeŭrabačańnie» ŭ nastupnym hodzie.
Takim čynam, u finale nacyjanalnaha adboračnaha tura konkursu zastalisia 14 udzielnikaŭ: Maćviej Bandarenka, Juryj Vaščuk, Daryja, Žaniet, Maks Łorens & DziDziuLa, Anastasija Małaškievič, Arciom Michalenka, Alina Moščanka, Natalla Adzincova, Alena Siniaŭskaja, Natalla Tamieła, a taksama hurty Napoli, Nuteki i Switter boys.
Finalny kancert, na jakim vyznačycca biełaruski ŭdzielnik mižnarodnaha konkursu pieśni «Jeŭrabačańnie-2014», projdzie ŭ Biełteleradyjokampanii 10 studzienia. Pieramožcam stanie vykanaŭca, jaki nabiare najbolšuju kolkaść bałaŭ pavodle vynikaŭ hałasavańnia prafiesijnaha žury i hladackaha hałasavańnia.
«Jeŭrabačańnie-2014» projdzie ŭ Danii z 6 pa 10 maja.
