Papiaredniaje suženstva ŭ Sorasa raspałasia ŭ 2005-m.
Džordž Soras — talenavity inviestar, jaki sabraŭ bahaćcie, što aceńvajecca prykładna ŭ 20 miljardaŭ dalaraŭ. Adnak jašče bolšuju viadomaść jak zdabyŭ jak fiłantrop.
U apošnija dziesiacihodździ bolšaść svaich prybytkaŭ jon układaŭ u dabračynnaść.
Open Society Foundation prafinansavała samyja roznyja prajekty ŭ dziasiatkach krain na 7 miljardaŭ dalaraŭ. U ZŠA Soras padtrymlivaŭ libierałaŭ i antyvajennyja inicyjatyvy. Va ŭsich śviecie jon davaŭ hrošy na prajekty, źviazanyja z abaronaj pravoŭ žančyn, mienšaściaŭ — naprykład, cyhanoŭ, na raźvićcio navuki, kultury, padtrymku svabody słova, baraćbu ź biednaściu.
Adździaleńnie svajho fondu ŭ Rasii Soras zakryŭ — pryznaŭ, što karupcyja tam niepieramožnaja i pranikła navat u jahony fond. U Biełarusi Fond Sorasa začynili ŭ 1997-m, bo jon padtrymlivaŭ niezaležnyja ŚMI.
Džordž Soras naradziŭsia pierad vajnoj u Vienhryi i cudam vyžyŭ u časie Chałakostu. Paśla vajny jamu ŭdałosia emihravać z kamunistyčnaha režymu na Zachad.
U znak pašany da svaich centralnajeŭrapiejskich karanioŭ jon ukłaŭ najbolšyja hrošy ŭ dabračynnaść mienavita ŭ hetym rehijonie, u tym liku i ŭ Biełarusi. Paśla zabarony fondu ŭ našaj krainie jon praciahvaŭ dziejnaść, raźličanuju dla biełarusaŭ, z-za miažy. Jaho pryjarytetam była padtrymka biełaruskaj kultury i niezaležnych inicyjatyŭ.
Svoj treci šlub Soras biare, niby pieršy. Viasielle budzie doŭžycca try dni.
Jano pačałosia ŭčora viačeraj i pryjomam u Muziei sučasnaha mastactva na Manchetenie ŭ Ńju-Jorku, spałučanym z adkryćciom vystavy Rene Mahryta.
Siońnia ŭ majontku Sorasa ŭ kole siamji — prysutničać buduć usie piać dziaciej Sorasa — adbudziecca cyrymonija rośpisu. Paśla hetaha ŭ adnym z mastackich centraŭ u štacie Ńju-Jork projdzie viasielnpia viačera. Na jaje zaprošana 500 haściej, siarod jakich prezident Estonii Ilvies, prezidentka Libieryi Sirleaf, premjer Ałbanii Rama, prezidenty Suśvietnaha banka i najbolšych inviestycyjnych fondaŭ, amierykanskija palityki-demakraty, artysty i navukoŭcy.
Sa svajoj abrańnicaj Soras upieršyniu sustreŭsia na viačery ŭ 2008 hodzie. Jana rodam z Kalifornii, dačka miedsiastry i aficera-maraka. Pracavała kansultantam u halinie adukacyi i achovy zdaroŭja. Jaje apošnim prajektam było navučańnie johi praź internet.
Viačeru na viasielli budzie hatavać kuchar z restarana ŭ Kapienhahienie, u jakim, tak zdaryłasia, Soras i Bołtan upieršyniu paviačerali razam u 2009-m.
Śpiavać na viasielli budzie piajula Maja Andrade z Kaba-Vierde. Arkiestram budzie dyryžyravać siabar siamji Ivan Fišer ź Vienhryi — viadomy kampazitar.
A zamiest padarunkaŭ Soras i Bołtan paprasili haściej zrabić achviaravańni ŭ dabračynnyja fondy Global Witness, Harlem's Children Zone, Nacyjanalny instytut tancu, Planned Parenthood i Fond adukacyi cyhanoŭ.
Nadzvyčaj bahaty čałaviek, Soras zastajecca davoli ścipłym u pobycie. Narodny paet Biełarusi Ryhor Baradulin pryhadvaŭ, jak u časie svajoj sustrečy ź fiłantropam u 1990-ch jon najbolš uraziŭsia tamu, jak Soras źjadaŭ usio na talercy i navat vymačvaŭ padlivu chlebam.
Viadoma, što asnoŭnuju častku svajho bahaćcia Soras zaviaščaŭ dabračynnym fundacyjam.
