|
Staršyni Kanfierencyi Katalickich Biskupaŭ Biełarusi Vysokadastojnyja Uładyki, darahija Braty ŭ biskupstvie! Hetymi dniami Mitrapality, arcybiskupy i biskupy Ukrainskaj Hreka-Katalickaj Carkvy na čale ź Pieršaijeracham Carkvy pravodziać śviaty Sinod u Kijevie. Hety Sinod źviazany z usienarodnym pałomnictvam da kijeŭskich śviatyniaŭ u 1025-ty hod Śviata-Uładzimiravaha Chrostu z aśviačeńniem Patryjaršaha saboru Uvaskrasieńnia Chrystovaha. Sardečna dziakujem vam za list ad Kanfierencyi Katalickich Biskupaŭ Biełarusi, jaki staŭ śviedčańniem ščyrych i braterskich adnosinaŭ pamiž Ryma-Katalickim Kaściołam u Biełarusi i UHKC. Taksama ščyra dziakujem vam za vialikaje spryjańnie i padtrymku dla dastojnaha archimandryta Siarhieja Hajeka, Apostalskaha vizitatara dla hreka-katolikaŭ Biełarusi, a taksama dla śviataroŭ i viernikaŭ uschodniaj tradycyi ŭ niaprostaj spravie adnaŭleńnia parafij i struktur Biełaruskaj Hreka-Katalickaj Carkvy. U hod 1025-hodździa Chrostu Rusi histaryčnaja pamiać viartaje nas u minułaje. Padzieja Chrostu kijanaŭ u Dniapry 988 hoda śviatym i vialikim kniaziem Uładzimiram paŭpłyvała na histaryčny los nie tolki žycharoŭ Kijeva, ale i ŭsioj tahačasnaj Rusi, u jakoj žyli prodki jak ukraincaŭ, tak i biełarusaŭ. Carkva, jakaja paŭstała ŭ pracesie chryścijanizacyi Rusi – Kijeŭskaja Mitrapolija – stałasia i zastajecca da siońniašniaha dnia duchoŭnaj baćkaŭščynaj našych narodaŭ. Kijeŭskaje chryścijanstva zakłała padmurki ŭkrainskaj i biełaruskaj nacyjanalna-kulturnych identyčnaściaŭ. Misijaniery Kijeŭskaj Carkvy pašyryli chryścijanstva siarod susiednich narodaŭ, zapaliŭšy i dla ich śviatło Chrystovaha Jevanhiella. Na praciahu stahodździaŭ nas abjadnoŭvaŭ nie tolki Kijeŭ – maci haradoŭ ruskich i centr chryścijanskich pałomnictvaŭ, ale i Vilnia, dzie supracoŭničali pamiž saboju mitrapalit Jazep z Ruty dy ijeramanach Jazafat z Uładzimira-Vałynskaha. Nas asabliva abjadnała biełaruskaje Bieraście, u jakim našyja prodki saborna paćvierdzili ichniuju sułučnaść (communio) z Rymskim Kaściołam. Nas abjadnoŭvajuć mučaniki dy vyznaŭcy carkoŭnaj jednaści. Heta słaŭnaja i vieličnaja supolnaja historyja. U naš čas biełarusy, jak i ŭkraincy, naležać nie tolki da Hreka-Katalickaj (Unijnaj), ale i da Ryma-Katalickaj dy Pravasłaŭnaj Cerkvaŭ, a taksama i da roznych pratestanckich kanfiesij. Tak skłałasia ŭ vyniku jak asabistaha vybaru, tak i peŭnych histaryčnych abstavinaŭ. Ale jubilej Chrostu viartaje nas usich da krynicaŭ, da supolnych duchoŭnych karanioŭ. Heta našaje supolnaje śviata. Tamu ščyra vinšujem ź jubilejem našych bratoŭ pa viery i tradycyi – biełaruskich katolikaŭ. Niachaj Baharodzica, prasłaŭlenaja ŭ Žyrovickaj i Zarvanickaj ikonach, budzie niabiesnaj apiakunkaj našaha supracoŭnictva. Asabliva daručajem hetaje supracoŭnictva pakrovu Budsłaŭskaj ikony Baharodzicy ŭ 400-hodździe jaje prybyćcia ŭ hetaje śviatoje miesca, a taksama śviatamučaniku Jazafatu, arcybiskupu Połackamu, u 390-hodździe jaho mučanictva za jednaść Cerkvaŭ. A śviatyja Kiryła i Miatod, aśvietniki słavianaŭ, u 1150-hodździe pačatku ichniaj słavianskaj misii niachaj błahasłaŭlajuć usie pačynańni našych Cerkvaŭ u spravie novaj jevanhielizacyi ŭkraincaŭ i biełarusaŭ – členaŭ i ŭdzielnikaŭ jeŭrapiejskaj chryścijanskaj supolnaści. Z chryścijanskim pryvitańniem i vyrazami bratniaj lubovi +ŚVIATASŁAŬ (Šaŭčuk) |
Jaho Ekscelencyi biskupu Alaksandru Kaškieviču
