Śbierbank Rasii abmiarkoŭvaje z «Biełaruśkalijem» mahčymaść paŭtornaha refinansavańnia kredytu na 1 miljard dalaraŭ, paviedamiŭ žurnalistam u Maskvie kiraŭnik Śbierbanka Hierman Href.
«Biełaruśkalij» u śniežni 2011 hoda atrymaŭ hadavy sindykavany kredyt ad «Śbierbanka Rasii» i «Jeŭrazijskaha banka raźvićcia» na 1 młrd. dalaraŭ. Srodki byli ŭklučany ŭ skład zołatavalutnych reziervaŭ Biełarusi šlacham vypusku doŭhaterminovych dziaržpapier na 800 młn. dalaraŭ, jakija vykupiŭ «Biełaruśkalij».
Vosieńniu 2012 hoda było padpisana pahadnieńnie ab refinansavańni kredytu.
«My ciapier razhladajem patencyjalnuju mahčymaść źmianieńnia hrafika płaciažoŭ pa kredycie. Biełaruski bok paćvierdziŭ svaju prychilnaść pa vykanańni ŭsich abaviazacielstvaŭ.
Ciapier časova skłałasia vielmi ciažkaja situacyja ŭ suviazi sa skasavańniem ich pahadnieńnia z "Urałkalijem". Ja dumaju, što pastupova situacyja stabilizujecca, i jany zmohuć uvajści znoŭ u hrafik płaciažoŭ. My ciapier ź imi znachodzimsia ŭ stadyi pieramoŭ nakont taho, jak my možam źmianić hrafik płaciažoŭ», — cytuje Hrefa RIA Novosti.
Znachodziačysia tydzień tamu ŭ Minsku Href nie vyklučaŭ, što Biełarusi zapatrabujecca paŭtornaje refinansavańnie kredytu. Miž tym hiendyrektar «Biełaruśkalija» Valeryj Kiryjenka ŭ siaredzinie žniŭnia zajaŭlaŭ, što biełaruskaja kampanija maje namier vykonvać usie ŭziatyja na siabie abaviazacielstvy pa absłuhoŭvańni i pahašeńni refinansavanaha rasijskim Śbierbankam ekspartnaha kredytu.
Jak paviedamlałasia raniej, ekspart «Biełaruśkalija» skłaŭ u studzieni-lipieni 2013 hoda 1,38 młrd. dalaraŭ.
Takim čynam, u paraŭnańni z anałahičnym letašnim pieryjadam ekspart u hrašovym vyražeńni źniziŭsia na 23,5%. U toj ža čas u fizičnym vyražeńni ekspart zachavaŭsia na letašnim uzroŭni. Pavodle źviestak «Biełaruśkalija», za studzień-lipień 2013 hoda abjom vytvorčaści kalijnych uhnajeńniaŭ u naturalnym padliku skłaŭ 4,9 młn. ton.
«Urałkalij» u kancy lipienia spyniŭ supracoŭnictva z «Biełaruśkalijem» u častcy sumiesnych prodaž i vyrašyŭ źmianić stratehiju, skancentravaŭšysia na pavieličeńni abjomaŭ vytvorčaści.
Hiendyrektar «Biełaruśkalija» Valeryj Kiryjenka na pres-kanfierencyi 19 žniŭnia paviedamiŭ: «Pakupniki zaniali čakalnuju pazicyju, i ŭ suviazi z hetym novyja kantrakty na nabyćcio kalijnych uhnajeńniaŭ pakul nie zaklučajucca. Čamu rynak miortvy? Niama cenavoha dna. Navošta kuplać, kali zaŭtra nazavuć canu mienšuju?» — zajaviŭ Kiryjenka, charaktaryzujučy pavodziny pakupnikoŭ kalijnych uhnajeńniaŭ.
«Biełaruśkalij» źjaŭlajecca adzinym vytvorcam chłorkaliju ŭ Biełarusi i adnym z najbujniejšych pastaŭščykoŭ kalijnych uhnajeńniaŭ na suśvietny rynak.
Svaju pradukcyju pradpryjemstva ciapier realizuje praź Biełaruskuju kalijnuju kampaniju. Dola «Biełaruśkalija» ŭ suśvietnaj vytvorčaści kalijnych uhnajeńniaŭ składaje kala 15%. Śpisačnaja kolkaść piersanału na 1 žniŭnia 2013 hoda — 19,8 tys. čałaviek.
