Nacyjanalny bank rezka pavysić patrabavańni da kapitału bankaŭ, jakija vydajuć spažyvieckija kredyty pa vysokich pracentnych staŭkach. Takija miery praduhledžany prajektam pastanovy Nacbanka.
Zhodna z dakumientam, jaki moža nabyć moc 1 studzienia 2014 hoda, kredyty, pracentnaja staŭka pa jakich budzie ŭ 2,5 razu pieravyšać staŭku refinansavańnia, stanuć adnosicca da vośmaj (pavodle kłasifikacyi centrabanka) hrupie ryzyki. Stupień ryzyki pa takich kredytach płanujecca ŭstanavić na ŭzroŭni 200%.
Kali staŭka pa kredytach pieravysić staŭku refinansavańnia ŭ try razy, to takija aktyvy buduć adnosicca da jašče bolš vysokaj hrupy ryzyki. Stupień ryzyki pa takich kredytach budzie ŭstanoŭlena na ŭzroŭni 500%.
Jak rastłumačyli bankiry, zaraz roźničnyja kredyty adnosiacca da piataj hrupy ryzyki sa stupieńniu ryzyki 75%.
Pry takoj stupieni ryzyki bank na 1 rubiel ułasnaha kapitału moža vydać pryblizna 13 rubloŭ kredytaŭ. Kali ž stupień ryzyki pa kredycie ŭzraście da 200%, to na 1 rubiel ułasnaha kapitału bank zmoža vydać tolki 5 rubloŭ u vyhladzie kredytaŭ, a pry stupieni ryzyki 500% — 2 rubli.
Jak zaznačajuć śpiecyjalisty, u vypadku pryniaćcia hetaj pastanovy banki nie zmohuć prapanoŭvać kredyty pa staŭcy, što ŭ try razy pieravysić staŭku refinansavańnia, bo takija pradukty buduć pazbaŭleny ekanamičnaha sensu.
«Dla banka niavyhadna mieć navat zvyšdachodnyja kredyty (aktyvy), jakija buduć usiaho tolki ŭ dva razy pieravyšać kapitał banka. Zabiaśpiečyć rentabielnaść kapitału pry takoj praporcyi budzie niemahčyma», — rastłumačyŭ BiełaPAN top-mieniedžar adnaho z bankaŭ.
Zaraz staŭka refinansavańnia składaje 23,5% hadavych. Adpaviedna prapanoŭvać kredytnyja pradukty, staŭki pa jakich buduć vyšejšyja za 70,5% hadavych, bankam stanie niavyhadna. Zaraz staŭki pa ekspres-kredytach, jakija banki vydajuć u mahazinach, u mnohich vypadkach pieravyšajuć 70% hadavych.
Tearetyčna banki mohuć źnizić staŭki pa ekspres-kredytach da 60% hadavych, kab mieć mahčymaść na 1 rubiel kapitału vydavać 5 rubloŭ kredytu. Adnak i hety varyjant moža być niemetazhodny.
«Staŭka 60% hadavych pa ekspres-kredytach nie ŭjaŭlajecca siońnia łahičnaj i cikavaj dla bankaŭ. Zaraz banki pryciahvajuć rublovyja resursy pa staŭcy 40–45% hadavych, a z ulikam usich apieracyjnych vydatkaŭ pa pryciahnieńni ŭkładaŭ pasivy realna abychodziacca siońnia bankam u 45–50% hadavych. Roźnica ŭ pamiery 10 pracentnych punktaŭ (pamiž staŭkami pa kredytach i depazitach) nie pakryvaje kredytnyja ryzyki, što ŭźnikajuć u pracesie vydačy ekspres-kredytaŭ», — padkreśliŭ u hutarcy z karespandentam BiełaPAN pradstaŭnik bujnoha roźničnaha banka.
Pryniaćcie pastanovy Nacbanka ŭ ciapierašnim varyjancie moža istotna źnizić cikavaść bankaŭ da spažyvieckaha kredytavańnia — u pryvatnaści istotna abmiažuje abjomy ekspres-kredytaŭ, što vydajucca ŭ mahazinach.
Varta zaznačyć, što hetaje rašeńnie ŭžo anansavała na hetym tydni kiraŭnika Nacbanka Nadzieja Jermakova. 18 vieraśnia padčas anłajn-kanfierencyi na sajcie ahienctva BiełTA jana zajaviła: «Mnohija našy maleńkija kamiercyjnyja banki, jakija pracujuć u asnoŭnym tolki ŭ roźničnym biźniesie, vydajuć kredyty nasielnictvu za paŭhadziny ci za hadzinu biez padavańnia adpaviednych dakumientaŭ abo na padstavie adnaho pašparta. Hetyja kredyty dachodziać da 130%. My ŭžo pryniali pastanovu ab abmiežavańni vydačy takich kredytaŭ. Hety dakumient zaraz znachodzicca na ekśpiertyzie ŭ adpaviednych zakanadaŭčych orhanach, i my spadziajemsia, što jon budzie pryniaty. Tady z 1 studzienia 2014 hoda banki ŭsio-taki prytarmoziać vydaču takich kredytaŭ — blic-kredytaŭ pad vysokija pracentnyja staŭki».
