Jeŭraparłamient na siesii ŭ Strasburhu viečaram 11 vieraśnia abmierkavaŭ dakład ab situacyi ŭ Biełarusi.
Dakumient padrychtavany dakładčykam Jeŭraparłamienta pa Biełarusi Justasam Paleckisam (Litva) dla Jeŭrakamisii, viarchoŭnaha pradstaŭnika ES pa źniešniaj palitycy i palitycy biaśpieki, Rady ES i dziaržaŭ — členaŭ Jeŭrasajuza.
Prezientujučy dakład, Paleckis zaznačyŭ, što situacyja z pravami čałavieka ŭ Biełarusi praciahvaje zastavacca ciažkaj.
Razam z tym jon padkreśliŭ, što staršynstvo Litvy ŭ ES i samit Uschodniaha partniorstva, jaki projdzie ŭ Vilni ŭ listapadzie, nieabchodna vykarystać dla palapšeńnia adnosinaŭ ź Minskam i adnaŭleńnia palityčnaha dyjałohu.
«Viadoma ž, heta mahčyma tolki pry ŭmovie, što buduć vyzvaleny ŭsie palitviaźni», — skazaŭ Paleckis.
Jeŭrakamisar pa pytańniach pašyreńnia i dobrasusiedstva Štefan Fiule, jaki vystupaŭ ad imia viarchoŭnaha pradstaŭnika ES pa pytańniach źniešniaj palityki i palityki biaśpieki, zaznačyŭ, što vykładzienyja ŭ dakładzie rekamiendacyi «dapamohuć u vyrašeńni pytańnia, jak znajści vyjście sa składanaj situacyi ŭ krainie-susiedcy».
Jon zaznačyŭ, što ES hatovy paŭnavartasna supracoŭničać ź Minskam, ale tolki pry ŭmovie, što «ŭsie palityčnyja źniavolenyja buduć vyzvaleny i reabilitavany, a Biełaruś prademanstruje prahres u śfiery zachavańnia pravoŭ čałavieka».
«Dakład ža havoryć, što situacyja pakul nie mianiajecca, — skazaŭ Fiule. — Siamiora palitźniavolenych pa-raniejšamu znachodziacca ŭ turmie. Maratoryj na śmiarotnuju karu ŭsio jašče nie ŭviedzieny. Praciahvajecca pieraśled aktyvistaŭ hramadzianskaj supolnaści i krytykaŭ ułady».
U suviazi z hetym, padkreśliŭ jeŭrakamisar, u ES niama vybaru, aprača jak praciahnuć u dačynieńni da Biełarusi palityku abmiežavalnych mier, da pierahladu jakich Rada ES vierniecca ŭ kastryčniku hetaha hoda.
Razam z tym Fiule zaznačyŭ, što paśla pryznačeńnia Uładzimira Makieja ministram zamiežnych spraŭ uładami Biełarusi byŭ zrobleny šerah zachadaŭ dla naładžvańnia adnosinaŭ ź ES, u tym liku Minsk pahadziŭsia na adnaŭleńnie pracy ŭ krainie pasolstva Šviecyi. «My heta vitajem, — skazaŭ Fiule. — Ale vyklikaje škadavańnie, naprykład, toje, što ŭžo na praciahu dvuch hadoŭ niama adkazu na našu prapanovu pačać pieramovy ab ablahčeńni vizavaha režymu pamiž ES i Biełaruśsiu».
Deputaty Jeŭraparłamienta, jakija vystupili, taksama asabliva padkreślili, što abaviazkovaj umovaj dla adnaŭleńnia dyjałohu z aficyjnym Minskam ź`iaŭlajecca vyzvaleńnie ŭsich palitźniavolenych.
Jak paviedamiŭ pavodle vynikaŭ abmierkavańnia Justas Paleckis, hałasavańnie pa dakładzie adbudziecca 12 vieraśnia.
Pavodle słoŭ Paleckisa, jon zadavoleny tym, jak prajšło abmierkavańnie dakumienta ŭ Jeŭraparłamiencie. «Deputaty vielmi pravilna kazali pra toje, što palitźniavolenyja — heta pytańnie numar adzin, — skazaŭ jon. — Ale, pa-mojmu, niekatoryja ź ich nie zrazumieli, što heta nie adna z 37 rezalucyj pa Biełarusi ab parušeńni pravoŭ čałavieka,
a pieršaja za 19 hadoŭ sproba nie tolki acanić situacyju ŭ krainie, ale i pahladzieć na dalejšuju stratehiju ŭ dačynieńni da Biełarusi, zrazumieć, što rabić, kab palepšyć situacyju».
Jak padkreśliŭ Paleckis, jamu chaciełasia, kab bolš havaryli mienavita pra toje, jak damahčysia źmianieńnia i palapšeńnia situacyi ŭ Biełarusi.
Pavodle acenki jeŭradeputata, padčas hałasavańnia 12 vieraśnia dakład pavinien być uchvaleny, tamu što jość kansiensus pamiž usimi palityčnymi partyjami i frakcyjami ŭ parłamiencie. «Pavinna adbycca niešta ekstraardynarnaje, kab jaho nie ŭchvalili», — skazaŭ Paleckis.
Jon zaznačyŭ, što paśla ŭchvaleńnia dakład budzie nakiravany ŭ Jeŭrakamisiju, viarchoŭnamu pradstaŭniku ES pa źniešniaj palitycy i palitycy biaśpieki, Radzie ES i dziaržavam — členam Jeŭrasajuza. «Ale heta mienavita rekamiendacyi taho, jak im varta dziejničać, — skazaŭ Paleckis. — Chacia potym na sustrečach my budziem pytacca ŭ ich, ci vykonvajuć jany tuju abo inšuju rekamiendacyju, što ŭžo zrabili i hetak dalej».
