Pa spravie hibieli 23-hadovaj Julii Kubaravaj zatrymanyja aniestezijołah, chirurh, dźvie miedsiastry i hiendyrektar STAA «Ekamiedsiervis-Miedycynski centr» Halina Vałžankina.
Pra heta žurnalistam paviedamiŭ staršynia SK Kastryčnickaha rajona Minska Andrej Kažeŭnikaŭ.
Pa fakcie hibieli Julii Kubaravaj raspačataja kryminalnaja sprava pa artykule 162 č. 2 KK «Nienaležnaje vykanańnie prafiesijnych abaviazkaŭ miedycynskim rabotnikam, što paciahnuła pa nieaściarožnaści śmierć pacyjenta abo zaražeńnie VIČ-infiekcyjaj». Kažeŭnikaŭ paviedamiŭ, što baćka Julii źviarnuŭsia ŭ SK 17 krasavika 2013 hoda, adnak kryminalnuju spravu zaviali tolki siońnia.
Maksimalnaje pakarańnie, praduhledžanaje dadzienym artykułam — abmiežavańniem voli na termin da piaci hadoŭ abo pazbaŭleńniem voli na toj ža termin z pazbaŭleńniem prava zajmać peŭnyja pasady abo zajmacca peŭnaj dziejnaściu abo biez pazbaŭleńnia.
Pavodle papiarednich vynikaŭ pravierki stała viadoma, što paśla trahičnaha zdareńnia aparat štučnaj vientylacyi lohkich byŭ adramantavany. Adnak śledčyja kanfiskavali jaho, a taksama jahonyja elemienty, jakija zamianili ŭ časie ramontu. Jość padstavy mierkavać, što aparat na momant praviadzieńnia apieracyi byŭ niaspraŭny i nie moh naležna vykonvać svaje funkcyi.
Pavodle infarmacyi «Našaj Nivy», pryčynaj śmierci 23-hadovaj Julii Kubaravaj paśla płastyčnaj apieracyi na nosie ŭ centry «Ekamiedservis» mahła stać niaspraŭnaść abstalavańnia.U časie apieracyi dziaŭčyna ŭpała ŭ komu, ź jakoj nie vyjšła.
Voś što raskazaŭ «NN» śpiecyjalist, znajomy z chodam pravierki.
«U «Ekamiedservisie» dziaŭčynie dali ŭnutryvienny narkoz — tam tolki taki i robiać. Adnak pry hetym jaje padklučyli da aparata štučnaj vientylacyi lohkich z zakrytym konturam, h.zn. u jakim pavietra cyrkuluje pa kole. Choć zvyčajna ŠVŁ z zakrytym konturam užyvajuć pry hazavym narkozie: kab darahi narkoz nie vychodziŭ u pavietra i kab im nie dychali lekary.
U aparacie ŠVŁ z zakrytym konturam jość absorbier — prostymi słovami, filtr, jaki vydalaje lišak vuhlakisłaha hazu z pavietra, jakim dychaje čałaviek. U ekamiedservisaŭskim aparacie ŠVŁ hety absorbier byŭ užo ni na što nie prydatny, jaho musili zamianić jašče ŭ 2010 hodzie. I nie było ŭ ich hazavaha manitora, jaki pakazvaje kancentracyju hazaŭ i kaštuje zusim tanna. Tamu padčas apieracyi dziaŭčyna paprostu atruciłasia SO2 i ŭpała ŭ komu, ź jakoj tak i nie vyjšła — dla śmierci mozhu šmat času nie treba.Dziŭna čytać kamientary ludziej, jakija nie viedajuć, jak vyhladaje skalpiel, a vinavaciać va ŭsim chirurha. Jon rabiŭ svaju spravu i biez manitora, tolki pa vyhladzie pacyjentki, nie moh zaŭvažyć niejkaj patałohii.
U zdareńni vina ŭłaśnika abstalavańnia i anastezijołaha», — ličyć śpiecyjalist.
«Naša Niva» zapytałasia ŭ niekalkich daktaroŭ, ci imaviernaja takaja pryčyna trahiedyi.
«Hetaja situacyja nahadvaje śmierć dźviuch rožanic u Homieli, — kaža anastezijołah-reanimatołah Źmicier Sałoškin, — kali pabłytali bałony i puścili ŭ sistemu vuhlakisły haz.Tut, mahčyma, taksama nie sačyli za stanam absarbienta ŭ aparacie ŠVŁ. Vidać, padčas Julinaj apieracyi jon pierastaŭ vykonvać svaju funkcyju kančatkova, i ŭ kontury nakoplivaŭsia dyjaksid vuhlarodu. U vyniku — hipierkapničnaja koma.
Pry hetym biez hazavaha manitora možna i nie zaŭvažyć źmianieńni stanu. Navat naadvarot, vuhlakisły haz moža vyklikać parez — rasšyreńnie — drobnych sasudaŭ, i pacyjent nie sinieje, jak pry hipaksii, a zastajecca ružovym.Kisłarodu mahło być dosyć, ale manitor moh nie pakazvać utrymańnie SO2», — patłumačyŭ Sałoškin.
