«Biełaruskija VNU majuć vysokuju stupień aŭtanomii. Jany bolšuju nie prosiać», — zajaviŭ ministr adukacyi Siarhiej Maskievič paśla sustrečy z pryziorami mižnarodnych alimpijad i kanfierencyj 3 maja ŭ Minsku.
Pry hetym Maskievič zaznačyŭ, što ministerstva było b nie suprać, kali b VNU zachacieli ŭziać na siabie adkaznaść za navučalnaje płanavańnie i jakaść adukacyi.«VNU lepš, kab hetuju pracu vykonvali słužby pry Ministerstvie adukacyi — tady jany majuć harantyju, što praca vykanana na vysokim uzroŭni. Inakš kožnaja VNU budzie rabić tak, jak joj vyhadna», — zaznačyŭ ministr.
Pavodle jaho słoŭ, u krainach, dzie VNU vałodajuć vialikaj samastojnaściu, jak praviła, arhanizujecca źniešni aŭdyt-kantrol, što dazvalaje vyznačyć jakaść adukacyi.«Jany arhanizujuć źniešni kantrol, stvarajuć rejtynhi, tamu što kožny ŭniviersitet idzie sa svaim navučalnym płanam. U nas kožny ŭniviersitet maje ahulnuju bazavuju kampanientu navučalnaha płana, jakaja abaviazkovaja dla ŭsich i harantuje ŭzrovień jakaści. Tryccać pracentaŭ prahramy kožnaja VNU moža farmiravać sama, zychodziačy sa svaich tradycyj, zadač i intaresaŭ studentaŭ», — skazaŭ Maskievič.
Jon zaznačyŭ, što biełaruskija VNU pieradajuć svaje prapanovy Ministerstvu adukacyi, jakoje, u svaju čarhu, suadnosić ich z adukacyjnym standartam.«Hetym moža zajmacca i nie ministerstva, a niedziaržaŭnaja struktura, ale hetuju funkcyju pavinien niechta vykonvać, inakš nie budzie ahulnaj bazy. Kali student vučyŭsia ŭ adnoj VNU, a potym zachacieŭ pierajści ŭ inšuju, jak heta zrabić? Kali na adnoj i toj ža śpiecyjalnaści dziejničajuć roznyja płany, i jany nie stykujucca», — dadaŭ ministr.
"Tamu my biarom najlepšaje z bałonskaha vopytu — kredytna-modulnuju sistemu, pradmiety pa vybary studentaŭ", — skazaŭ Maskievič.
Nahadajem, nizki ŭzrovień univiersiteckaj aŭtanomii i studenckaha ŭdziełu ŭ kiravańni źjaŭlajecca asnoŭnym arhumientam suprać dałučeńnia Biełarusi da Bałonskaha pracesu.
0
0
0
0
0
0
