Nieadnarazovyja śćviardžeńni ŭrada Biełarusi ab tym, što sankcyi ZŠA parušajuć Budapiešcki miemarandum ab harantyjach biaśpieki 1994 hoda, źjaŭlajucca nieabhruntavanymi. Pra heta havorycca ŭ raspaŭsiudžanaj siońnia zajavie pasolstva ZŠA ŭ Minsku.
«Choć miemarandum i nie niasie pramoj jurydyčnaj siły, my surjozna padychodzim da svaich palityčnych abaviazacielstvaŭ pierad Biełaruśsiu i ličym, što ŭviedzienyja ZŠA sankcyi — budzie heta ŭ suviazi ź situacyjaj z pravami čałavieka ci z zakłapočanaściu pytańniami nieraspaŭsiudžańnia — nie padryvajuć našych abaviazacielstvaŭ i nie iduć ź imi ŭrazrez», — havorycca ŭ zajavie.
Sankcyi, padkreślivajecca ŭ dakumiencie, skiravanyja na toje, kab zabiaśpiečyć u Biełarusi vykanańnie pravoŭ čałavieka, a taksama na baraćbu z raspaŭsiudžvańniem zbroi masavaha źniščeńnia i inšaj niezakonnaj dziejnaściu, a nie na atrymańnie jakich-niebudź pieravah dla Złučanych Štataŭ.
Nahadajem, pieršapačatkova ekanamičnyja sankcyi ŭ dačynieńni da «Biełnaftachima» byli ŭviedzienyja ZŠA ŭ listapadzie 2007 hoda ŭ suviazi z parušeńniem pravoŭ čałavieka ŭ Biełarusi.U sakaviku 2008-ha, paśla taho jak ułady Biełarusi admovilisia vyzvalić byłoha kandydata ŭ prezidenty Alaksandra Kazulina, ZŠA ŭviali sankcyi ŭ dačynieńni da ŭsich pradpryjemstvaŭ, jakija ŭvachodziać u skład kancerna. Paźniej byli ŭviedzienyja sankcyi suprać pradpryjemstvaŭ «BiełOMA», «Biełtechekspart», «Biełźniešpramservis».
Budapiešcki miemarandum padpisali ŭ śniežni 1994 hoda kiraŭniki Biełarusi, Vialikabrytanii, Rasii i ZŠA Alaksandr Łukašenka, Džon Mejdžar, Barys Jelcyn i Bił Klintan. Pavodle artykuła 3 dakumienta nazvanyja krainy ŭ suviazi z dobraachvotnaj admovaj Biełarusi ad statusu jadziernaj dziaržavy abaviazalisia «ŭstrymlivacca ad ekanamičnaha prymusu, skiravanaha na toje, kab padparadkavać svaim ułasnym intaresam ažyćciaŭleńnie Respublikaj Biełaruś pravoŭ, ułaścivych jaje suvierenitetu, i takim čynam zabiaśpiečyć sabie pieravahu luboha rodu».
U śniežni 2012 hoda ŭ MZS Biełarusi byli zaprošanyja pradstaŭniki pasolstvaŭ Vialikabrytanii i ZŠA. Dypłamatam zajavili, što, uvioŭšy adnabakovyja abmiežavalnyja miery ŭ dačynieńni da Biełarusi, ich krainy parušajuć uziatyja na siabie mižnarodnyja abaviazacielstvy.
