Doktar histaryčnych navuk Viačasłaŭ Švied faktyčna zvolnieny z Hrodzienskaha dziaržuniviersiteta imia Janki Kupały. Spačatku jaho zvolnili z pasady zahadčyka kafiedry biełaruskaj kultury i rehijanalnaha turyzmu, a 1 krasavika Rada ŭniviersiteta nie abrała jaho na pasadu prafiesara pa konkursie.
Prafiesar Viačasłaŭ Švied vystupiŭ z adkrytym listom da vykładčykaŭ Hrodzienskaha ŭniviersitetu imia Janki Kupały.
Šanoŭnyja kalehi!
U kancy sakavika 2013 h. skončyŭsia moj kantrakt na pasadzie zahadčyka kafiedry i mnie prapanavali pierajści na pasadu prafiesara. Ja prajšoŭ usie patrebnyja pracedury. Konkursnaja kamisija, praanalizavaŭšy maju pracu za apošnija 5 hadoŭ, adzinahałosna rekamiendavała maju kandydaturu da ŭdziełu ŭ konkursie na radzie ŭniviersitetu.
1 krasavika 2013 h. na radzie ŭniviersitetu adbyłosia hałasavańnie. Vyniki jaho (30 — «za», 41 — «suprać») vidavočna sfalsifikavanyja.
Tak hałasavać ludzi, jakija mianie dobra viedajuć, nie mahli. Liču, što nijakich padstaŭ dla takoha vyniku nie było, bo za čarhovyja 5 hadoŭ pracy mnoj było nadrukavana 28 navukovych i 3 navukova-mietadyčnyja pracy (u tym liku z hryfam Ministerstva adukacyi). Ja kiruju dziaržbiudžetnaj temaj «Turystyčnaja acenka pomnikaŭ historyi i kultury Paniamońnia». Udzielničaŭ u niekalkich kamiercyjnych temach. Dapamoh harvykankamu i ŭniviersitetu atrymać mižnarodnyja prajekty, finansavańnie jakich užo pačałosia. Papularyzuju historyju Haradzienščyny i jaje turystyčnyja resursy.
Ja pracavaŭ z Vami zvyš 30 hadoŭ. Za hety čas ja prajšoŭ šlach ad asistenta da zahadčyka kafiedry, abaraniŭ kandydackuju i doktarskuju dysiertacyi. Pa majoj inicyjatyvie była stvorana kafiedra turyzmu, a zatym i fakultet turyzmu i servisu, na jakim ciapier adnyja z samych vialikich konkursaŭ siarod abituryjentaŭ.Kafiedra ŭ 2012 h. dała prybytak univiersitetu na sumu 286 młn rub. Dziakujučy majoj idei, univiersitet udzielničaje ŭ prajekcie prahramy «Transhraničnoje sotrudničiestvo «Polša–Biełaruś–Ukraina – 2007–2013» — «Povyšienije privlekatielnosti transhraničnoho riehiona putiom vklučienija etnokulturnych riesursov v turističieskuju diejatielnosť (akronim – Putiešiestvije v etnoskazku)».
Za 30 hadoŭ pracy ja maju nastupnyja navukovyja dasiahnieńni: publikacyjaŭ — usiaho 287, siarod ich 4 manahrafii, 10 knih, 5 navučalnych dapamožnikaŭ.
A tamu ŭpeŭnieny, što majo zvalnieńnie źjaŭlajecca palityčnym rašeńniem — pomstaj za vydadzienuju knihu “Hrodnaznaŭstva. Historyja jeŭrapiejskaha horada”. Hetaja kniha była napisana pa majoj idei, ja stvaryŭ kalektyŭ aŭtaraŭ, kiravaŭ im, napisaŭ bolš za pałovu knihi, redahavaŭ jaje.Kniha była napisana pa prośbie nastaŭnikaŭ Horadni, jakija pracavali sa školnikami pa fakultatyŭnamu kursie «Hrodnaznaŭstva». Kurs byŭ uviedzieny rašeńniem siesii harsavietu pa inicyjatyvie jaho deputata A. Łaśminskaha, jaki ŭchvaliŭ i napisańnie padručnika. Apošni byŭ vydany dvuma vydańniami ŭ Haradzienskim univiersitecie paśla dvuchhadovych chadžeńniaŭ u abłvykankam, jaki tak i nie znajšoŭ hrošaj na vydańnie. Zatym tolki było ździejśniena treciaje vydańnie ŭ Vrocłavie, u drukarni Polskaj akademii navuk.
Abvinavačańni aŭtaraŭ u padpolnym vydańni takim čynam biespadstaŭnyja. Padkreślivaju, što ŭ Polščy vydadziena kniha, a nie padručnik, u čym taksama abvinavačvajuć aŭtaraŭ. My taksama mieli prava vybrać chranałahičny pieryjad historyi Horadni, pra jaki i napisali tekst — da 1994 h., što staviać nam u vinu.
Pavažanyja kalehi, ja nie prašu Vašaj dapamohi. Ja chaču rastłumačyć svaju pazicyju i kab Vy viedali, što ja zaŭsiody pisaŭ svaje tvory, abapirajučysia na histaryčnyja fakty. Za što siarod svaich kaleh-historykaŭ zasłužyŭ pryznańnie hłybokaha i abjektyŭnaha historyka.
Prafiesar Viačasłaŭ Švied
***
«U svaim univiersitecie i ŭ Hrodnie ŭvohule ja ničoha nie dabjusia. Jość zahad i jon vykonvajecca vielmi žorstka. Nie voźmuć navat dvornikam», — padzialiŭsia svaimi pierśpiektyvami z karespandentam «NN» prafiesar Švied.
Jon kaža, što zvolnieny de-fakta, kali ž budzie zvolnieny de-jure. pakul nie viedaje. «Pavodle ŭniviersiteckich praviłaŭ vykładčyk, jaki nie prajšoŭ na pasadu prafiesara pa konkursie, aŭtamatyčna zvalniajecca z pracy. Ja viedaju, što budu zvolnieny abaviazkova. heta pytańnie času».
Viačasłaŭ Švied pakul nie maje varyjantaŭ pracaŭładkavańnia. «Mušu ŭsio abdumać, abmierkavać».
