Fota radyjo «Svaboda».
Aktyvista niezaležnaha prafsajuzu Anatola Litvinku zvolnili ź mikaševickaha kamieniezdabyŭnoha pradpryjemstva «Hranit».
Z zahadam jaho aznajomili 1 krasavika, paśla vychadu z načnoj źmieny. U dakumencie, jaki padpisaŭ hieneralny dyrektar Eduard Haŭryłkovič, pryčynaj paznačana «systematyčnaje nievykanańnie pracoŭnych abaviazkaŭ».
Anatol Litvinka kaža, što budzie sudzicca z pradpryjemstvam: «Budziem źbiracca zaraz i abmiarkoŭvać stratehiju, jak dalej dziejničać. Užo vycisnuli amal usich najbolš aktyŭnych pradstaŭnikoŭ prafsajuzu. Ja planuju sudzicca, choć i spadziavańniaŭ vialikich na sud nia maju. Budu šukać inšaj pracy, ale i prafsajuznuju dziejnaść kidać nie źbirajusia».
Anatola kaža, što zvalnieńnie faktyčna pastaviła jahonuju siamju na miažu vyžyvańnia: «Žonka paśla zvalnieńnia z «Hranitu» doŭha nie mahła znajści pracu ŭ Łuninieckim rajonie. Ciapier znajšła časovuju. Ale asnoŭnym zdabyŭcom ja byŭ, dachodu žonki nia budzie chapać navat na biahučyja raschody — zapłacić za kamunalnyja i hetak dalej…»
Kiraŭnik supołki niezaležnaha prafsajuzu na «Hranicie» Aleh Stachajevič miarkuje, što nievypadkova dataj zvalnieńnia Anatola Litvinki abrali 1 krasavika: «Heta zroblena, kab macniej začapić: maŭlaŭ, voś vam Dzień śmiechu… Dyj nia pieršy raz tak — Hienadzia Paŭłoŭskaha zvolnili na jahony dzień narodzinaŭ, mianie pazbavili pravoŭ, kab zvolnić, taksama na dzień narodzinaŭ. Heta pakazvaje sutnaść tych ludziej, jakija heta robiać…»
Naprykancy 2011 hodu niekalki socień pracaŭnikoŭ pradpryjemstva pa zdabyčy budaŭničaha kamieniu «Hranit» u Mikaševičach napisali zajavy, što vychodziać z aficyjnaha prafsajuzu. Rabočyja abviaścili, što stvarajuć na pradpryjemstvie supołku Biełaruskaha niezaležnaha prafsajuzu. Adrazu ž siabry niezaležnaha prafsajuzu adčuli cisk na siabie z boku administracyi.
Z pradpryjemstva zvolnienyja aktyvisty BNP Aleh Stachajevič, Mikałaj Karyšaŭ, Hienadź Paŭłoŭski, Ludmiła Litvinka, Vital Pašečka.
