AktyvistaŁHBT-ruchu Siarhieja Androsienku raspranuli da trusoŭ na biełaruskaj pamiežnaj stancyi Hudahaj, paviedamlaje pravaabarončy prajekt «HiejBiełaruś».
Viečaram 27 sakavika Androsienku, jaki viartaŭsia ź Vilni, vysadzili ź ciahnika Vilnia — Minsk. Spačatku dva mytniki i adna asoba ŭ cyvilnym praviali mytny nadhlad rečaŭ aktyvista: zaplečnika, noŭtbuka, časopisa Sexus, što vydajecca «BiełHazietoj».
Praz hadzinu ad načalnika Ašmianskaj mytni Ivana Nieviarkieviča «pryjšłoŭ dazvoł na asabisty mytny nadhlad».«Siarhieja Androsienku raspranuli da trusoŭ, staranna pravieryli adzieńnie i abutak aktyvista na najaŭnaść «zabaronienych i abmiežavanych da pieramiaščeńnia tavaraŭ». Ale, jak i pry pieršym nadhladzie, takich tavaraŭ znojdziena nie było.
Paśla mytnaha kantrolu aktyvistu vydali kopii aktaŭ nadhladaŭ i pašpart i adpuścili, ale na vychadzie z zały mytnaha nadhladu aktyvista sustreŭ jašče adzin supracoŭnik mytni i paprasiŭ prajści ź im u inšy budynak dla vyrašeńnia «techničnaha pytańnia».U Androsienki znoŭ zabrali pašpart i zajavili, što jon ličycca ŭ bazie danych niesapraŭdnych dakumientaŭ.
Vydaŭšy pratakoł kanfiskacyi pašparta, Androsienku praviali ŭ zału čakańnia stancyi Hudahaj, dzie prapanavali čakać ranišniaha dyziela, jaki pavinien byŭ pryjechać praz šeść hadzin, i papiaredzili, što Hudahaj — pamiežnaja zona i znachodzicca ŭ joj biez pašparta nie dazvolena, tak što lepš vakzał nie pakidać.
«Chvilin praz 30–40 na stancyju znoŭ viarnuŭsia supracoŭnik, jaki dahetul prapanoŭvaŭ Androsienku prajści dla vyrašeńnia „techničnaha pytańnia“, paśla jakoha ŭ jaho zabrali pašpart. Jon znoŭ prapanavaŭ viarnucca ŭ pamiaškańnie mytni, dzie prapanavaŭ adkryć asabisty noŭtbuk Androsienki i pakazać jaho źmieściva.Aktyvist admoviŭsia ŭklučać svoj noŭtbuk, matyvujučy heta tym, što ŭžo prajšoŭ mytny nadhlad i ŭ jaho majucca adpaviednyja akty», — havorycca ŭ paviedamleńni.
17 studzienia ŭ Androsienki ŭžo zabirali pašpart pa toj ža pryčynie. Pry hetym na vyjeździe z krainy ŭ aktyvista takich prablem nie ŭźnikaje. Minułym razam aktyvistu addali pašpart praz try tydni.
Zabrać Androsienku sa stancyi Hudahaj pryjechali namieśnik pasła Niderłandaŭ u Varšavie, jaki ŭ hety čas znachodziŭsia z aficyjnym vizitam u Minsku, i «chłopiec samoha aktyvista».
«Ja rasceńvaju heta jak imknieńnie ŭład prymusić mianie admovicca ad pravaabarončaha aktyvizmu ci jak taki tonki namiok na toje, što mnie adčynienyja dźviery krainy tolki na vyjezd», — zajaviŭ Androsienka.
