U 2012 hodzie kolkaść zaklučanych šlubaŭ u Biełarusi pamienšyła, a skasavanych — vyrasła ŭ paraŭnańni z 2011 hodam.Pra heta paviedamiła načalnik hałoŭnaha ŭpraŭleńnia statystyki pasłuh i demahrafičnaj statystyki Nacyjanalnaha statystyčnaha kamiteta Iryna Šastakova.
Letaś było zarehistravana 76 tys. šlubaŭ, što na 10,5 tys. mienš, čym u 2011 hodzie.
«U narodzie ličycca, što ŭziać šlub u vysakosny hod — heta kiepskaja prykmieta. Tamu, kali praanalizavać pieryjad, u jakim možna prasačyć niekalki vysakosnych hadoŭ, to možna zrabić vysnovu, što ŭ kožnym z takich hadoŭ šlubaŭ zaklučajecca pryblizna na 10 tys. mienš, čym u papiaredni. 2012 hod nie staŭ vyklučeńniem», —skazała Šastakova. U 2012 hodzie na tysiaču nasielnictva prypadała 8,1 šlubu.
Najbolš intensiŭna ŭ 2012 hodzie brali šlub žychary Mahiloŭskaj vobłaści — 8,4 šlubu na tysiaču nasielnictva, Viciebskaj vobłaści i Minska — 8,2 šlubu na tysiaču nasielnictva, paviedamiła pradstaŭnik Biełstata. Najmienšaja intensiŭnaść zaklučeńnia šlubu adznačana ŭ Bresckaj vobłaści — 7,6 šlubu na tysiaču nasielnictva.
Pavodle słoŭ Šastakovaj,
z kožnym hodam uzrost zaklučeńnia šlubu pavialičvajecca.Siaredni ŭzrost dla žančyn u 2012 hodzie skłaŭ 24,6 hoda, paŭtornaha šlubu — 37,6 hoda. Mužčyny pieršy šlub u siarednim brali ŭ 27,6 hoda, paŭtorny — u 40,5 hoda. Šlub brali i žychary starejšych uzrostaŭ. U 2012 hodzie zaklučana 596 šlubaŭ, u jakich uzrost žanicha i niaviesty skłaŭ 60 hadoŭ i bolš, u tym liku 467 šlubaŭ u haradskich pasieliščach i 129 šlubaŭ u sielskich.
Jak paviedamiła Šastakova,
u 2012 hodzie 93% usich šlubaŭ u Biełarusi było zaklučana pamiž biełarusami.Siarod šlubaŭ, zaklučanych ź inšaziemcami, lidzirujuć šluby z hramadzianami krain SND. Ich dola składaje 75% ad ahulnaj kolkaści šlubaŭ ź inšaziemcami, ź jakich bolš za pałovu — sajuzy z hramadzianami Rasii.
Pavodle źviestak Biełstata, u 2012 hodzie było skasavana 39 tys. šlubaŭ, što na 450 bolš, čym u 2011 hodzie. Na tysiaču nasielnictva prypała 4,1 vypadku skasavańnia šlubu. Na tysiaču zaklučanych šlubaŭ u 2012 hodzie prypadała 512 vypadkaŭ skasavańnia (u 2011 hodzie — 445).
Sielskija siemji źjaŭlajucca bolš ustojlivymi. U 2012 hodzie ŭ haradskich pasialeńniach na tysiaču zaklučanych šlubaŭ prypała 528 skasavanych, tady jak u sielskaj miascovaści — 425.
Pavodle słoŭ Šastakovaj, čverć usich skasavańniaŭ prypała na siamiejnyja pary, jakija žyli u šlubie ad piaci da dzieviaci hadoŭ. Siarod skasavanych šlubaŭ najbolšaja ŭdzielnaja vaha — bolš za 40% — prypadaje na ŭzrost 25–34 hady. U 2012 hodzie prykładna 58% siamiejnych par pry skasavańni šlubu mieli niepaŭnaletnich dziaciej.
