Śpiecsłužby niekatorych krain u svajoj pracy aktyŭna vykarystoŭvajuć dyjasparu, jakaja žyvie ŭ Łatvii. U hetym płanie asabliva vyłučajecca Kamitet dziaržaŭnaj biaśpieki Biełarusi. Pra heta skazana ŭ štohadovaj spravazdačy Biuro abarony Satvierśmie (BZS).
Jak adznačaje biuro, meta zamiežnych śpiecsłužbaŭ, jakija pracujuć z suajčyńnikami, zaklučajecca ŭ tym, kab praduchilić źjaŭleńnie apazicyjnych nastrojaŭ u adnosinach da režymu na histaryčnaj radzimie.
Na praktycy heta vyhladaje nastupnym čynam: aficer raźviedki, jaki pracuje pad prykryćciem pasolstva, padtrymlivaje rehularnyja kantakty z usimi aktyŭnymi lidarami dyjaspary, źbiraje źviestki ab mierapryjemstvach, dzie mohuć prachodzić palityčnyja dyskusii, ustanaŭlivaje koła asob, jakija ŭdzielničajuć u patencyjna niebiaśpiečnych razmovach.
Za apošnija hady BZS zafiksavała šerah vypadkaŭ, kali dyjaspara ŭklučajecca ŭ mierapryjemstvy, arhanizavanyja raźviedkami adpaviednych krain. Hetyja akcyi pravodzilisia z metaj prademanstravać łajalnaść adpaviednaha režymu. Naprykład, pravodzilisia kanfierencyi, pa vynikach jakich zaćviardžalisia rezalucyi, napisanyja supracoŭnikami śpiecsłužbaŭ.
Paralelna zamiežnyja raźviedki viaduć rabotu sa ŚMI.Supracoŭniki «orhanaŭ», jakija pracujuć pad prykryćciem pasolstva, farmujuć koła žurnalistaŭ, ź jakimi padtrymlivajecca pastajannaje supracoŭnictva.
Dla takich žurnalistaŭ ładziać tury pa abmienie dośviedam, zabiaśpiečvajuć im ekskluziŭnyja intervju i roznyja materyjały. Raźviedki naŭprost nie kantralujuć pracu žurnalistaŭ, adnak pryvilei zabiaśpiečvajucca tolki pradstaŭnikam «siabroŭskich» vydańniaŭ.
