Ab prablemnych pytańniach raboty ŭ 2012 hodzie pradpryjemstvaŭ i halin, u tym liku bankavaj sistemy i valutnaha rynku, raspavioŭ na ŭčorašnim pasiadžeńni Savieta Ministraŭ, pryśviečanym vynikam sacyjalna-ekanamičnaha raźvićcia krainy za 2012 i zadačam na 2013 hod, staršynia Kamiteta dziaržaŭnaha kantrolu Biełarusi Alaksandr Jakabson.
Ź jahonych słoŭ,
najbolš vidavočnaj prablemaj ŭsich halin ekanomiki źjaŭlajecca nieadpaviednaść pamiž dekłaravanymi metami i dasiahanymi vynikami. Tak, praktyčna ŭsiudy nie vykanany najvažniejšyja pakazčyki źnižeńnia materyjała- i enerhajomistaści pradukcyi, piša BiełTA.
Taksama kiraŭnik KDK źviarnuŭ uvahu i na asobnyja vypadki machinacyj pry vykarystańni kredytnych resursaŭ. Ustanova robić zachady dla supraćdziejańnia roznym manipulacyjam dziaržaŭnymi srodkami na rynkach kaštoŭnych papier i strachavych pasłuh. «Rynak ablihacyj byŭ pryvabnym dla niesumlennych emitentaŭ, jakija, nie majučy nijakich aktyvaŭ, vypuskali ablihacyi pad atrymanyja harantyi dziaržaŭnych strachoŭščykaŭ i pradavali ich na biržy. U vyniku za niepłatazdolnych emitentaŭ ciapier raźličvajucca strachoŭščyki», — adrapartavaŭ Alaksandr Jakabson.
Akramia taho, značnyja dziaržaŭnyja srodki nakiroŭvajucca bujnymi pradpryjemstvami, takimi jak «Biełaruśkalij», «Brestenerha», «Hrodnaenerha» dy inšymi, na dobraachvotnaje strachavańnie dadatkovaj piensii.
«Hetyja srodki dziaržaŭnych pradpryjemstvaŭ pieraličvajucca pryvatnaj strachavoj kampanii «Biełaruski narodny strachavy piensijny fond», jakaja źmiaščaje ich na depazitach u bankach, a atrymanyja ad hetaha prybytki vykarystoŭvajuć u asabistych intaresach akcyjaniery hetaha tavarystva (dyrektarka i jejny muž, a taksama niekatoryja inšyja kamiercyjnyja struktury).
Tak, siaredni zarobak dyrektarki ŭ 2012 hodzie składaŭ Br 30 młn, a atrymanyja dyvidendy muža i žonki za hod skłali amal Br 3 młrd», — adznačyŭ staršynia KDK.
Łukašenka začapiŭsia za hetuju temu i zapatrabavaŭ u samyja ścisłyja terminy navieści ŭ hetym pytańni «paradak». Ab pryčynach situacyi raskazaŭ ministr finansaŭ Andrej Charkaviec. Sa słovaŭ ministra, u pryvatnaści, «Biełaruśkaliju» nie raz prapanoŭvałasia pierajści na absłuhoŭvańnie dziaržaŭnym strachavym pradpryjemstvam, adnak pytańnie z šerahu pryčyn nie vyrašajecca.
Padniali z kresła hienieralnaha dyrektara «Biełaruśkalija» Valeryja Kiryjenki, jaki spasłaŭsia na roznaha kštałtu ciažkaści. U svaju čarhu staršynia kancerna «Biełnaftachim» Ihar Žylin naohuł zajaviŭ, što «pra hetuju temu daviedaŭsia tolki ciapier».
«Moža być, tam Kiryjenka nie na miescy, kali jon elemientarnaje pytańnie nie moža rašyć? — hrymieŭ Łukašenka. — Alaksandr Sierafimavič (Jakabson), kali vy nie raźbieraciesia, ja raźbiarusia z vysnovami dla Vas. Vinavaty Kiryjenka — u turmu jaho. Vinavaty Žylin — naŭzdahon. Padnačalenyja — usich tudy».
«Try miljardy! Adkul hetyja hrošy?! Jany što, kalijnyja ŭhnajeńni vyrablajuć i pradajuć? Nie. I biezdapamožny Minfin!» — aburyŭsia Łukašenka.
«Vaźmicie na kantrol, kab hrošy hetyja, dyvidendy, układzienyja ŭ charomy dy inšaje, byli viernutyja.
Dumaju, vy heta vyrašycie na praciahu pieršaha kvartała. Voś, kali łaska, efiektyŭnaść pracy KDK, Kiryjenki, Žylina, ministra finansaŭ i premjer-ministra. Heta i jość farmalny biurakratyčny padychod, — padkreśliŭ Łukašenka. — Vam, Michaił Uładzimiravič (Miaśnikovič), i Jakabsonu heta prosta prykład vašaha padychodu da hetaha.
Kali vy nie mahli, zdymicie trubku, i ŭviečary była b rezalucyja, jakuju Valeryj Vakulčyk z kulamiotam vykanaŭ by ci ministr unutranych spraŭ
. Na vašych vačach raskradali hrošy, a vy spakojna da hetaha staviciesia».
«Da kanca sakavika ŭsie pytańni rašyć. Nie vyrašyć, Kiryjenku ŭ kamieru. A naŭzdahon — ministra», — daručyŭ Łukašenka staršyniu KDB.
«Alaksandr Sierafimavič, ja apošni raz vam rablu zaŭvahu. Abo Vy jak staršynia Kamiteta dziaržaŭnaha kantrolu dziejničajecie tak, jak maje być, abaraniajučy intaresy dziaržavy, abo pryjdzicie i skažycie: ja bajusia, nie mahu», — papiaredziŭ jon.
