Adna z samych tyražnych haziet krainy «Arhumienty i fakty v Biełoruśsii» i raniej źviartałasia da biełaruskaj movy na svaich staronkach, ale heta byli nievialikija publikacyi. Ciapier redakcyja vyrašyła pašyryć takuju praktyku: pad artykuły na movie nie škadujuć i cełych pałosaŭ. Adpaviednyja źmieny ŭnieśli i ŭ paśviedčańnie pra rehistracyju: vydańnie z ruskamoŭnaha stała dvuchmoŭnym.
«Što tyčycca najbolš papularnych rubryk «AiF-afaryzm», «AiF-fakt» albo «Narodny kalandar», to jany daŭno vychodziać u tym liku i na biełaruskaj movie, — adznačyŭ hałoŭny redaktar vydańnia Ihar Sakałoŭ. — Vydajučy tydniovik u Biełarusi, niama sensu hetyja rečy pierakładać. Bo jany nie prosta zrazumiełyja, ale i lubimyja».
Pa słovach Ihara Sakałova, čytačy ciopła ŭsprymajuć biełaruskuju movu.
«Niechta dumaje, što «AiF v Biełoruśsii » — heta rasijski tydniovik. Heta mižnarodny brend, stvorany čytačami byłoha SSSR. Ale kazać siońnia, što ŭ Biełarusi vychodzić miascovaje vydańnie rasijskaj haziety, nielha. Bo «AiF» ź miascovym kantentam vydajecca amal va ŭsich krainach byłoha Savieckaha Sajuza, u Jeŭropie, Azii, Amierycy. I my samadastatkovyja.
Tamu niama nijakich supiarečnaściaŭ ci dziva, što «AiF v Biełoruśsii» drukuje častku artykułaŭ na biełaruskaj movie».
Hazieta «Arhumienty i fakty» pačała vychodzić u 1978 hodzie, uvachodziła ŭ strukturu vydaviectva ŭsiesajuznaha tavarystva «Viedy». Spačatku na jaje staronkach publikavałasia statystyčnaja infarmacyja. Z časam pieratvaryłasia ŭ hramadska-palityčnaje vydańnie. U 1990 uniesienaja ŭ Knihu rekordaŭ Hinesa jak hazieta z samym vialikim nakładam u historyi — 33,5 młn asobnikaŭ.
U 1993 byŭ zasnavany tydniovik «AiF v Biełoruśsii». Nakład adnaho numara składaje 159 tysiač.
