Klatva hrypakrata: adsutnaść źviestak pra hryp — ad lanoty pres-centra ci infarmacyja niepažadana dla nasielnictva? 8

Tak pra hryp raskazvajuć niemcam.

Tak pra hryp raskazvajuć francuzam.

Tak pra hryp raskazvajuć biełarusam.

Tak pra hryp raskazvajuć biełarusam.

Hetyja hrafiki adlustroŭvajuć situacyju pa Biełarusi. Ale na sajcie Ministerstva achovy zdaroŭja Vy ich nie znojdziecie. Jany jość tolki na sajcie SAAZ pa-anhlijsku.

Hryp — chvaroba siezonnaja. Usie pamiatajuć paniku vakoł śvinoha hrypu ŭ 2009. Infarmacyi było mała. Ludzi dumali: «A ŭłady chavajuć, jak Čarnobyl kaliści chavali!». I biehli ŭ apteki, i «miali» ŭsio zapar. Zdajecca, navučanaje takim vopytam Ministerstva achovy zdaroŭja musiła b skarektavać svaju palityku infarmavańnia nasielnictva, ale viedamstva ministra Žarko, vidać, zastajecca pry dumcy, što «mienš viedaješ — macniej śpiš».

Kali ja — prosty hramadzianin…

Naprykład, ja — śviadomy hramadzianin RB, aścierahajusia siezonnaj epidemii hrypu i žadaju daviedacca pra stanovišča na siońnia, kab skarektavać svaje pavodziny ŭ vypadku pavyšanaj niebiaśpieki: iści adzin prypynak da mietro, a nie prajazdžać jaho na pierapoŭnienym tralejbusie, nie zabyvać čaściej myć ruki, staracca lišni raz nie paciskać ruki. Ja śviadomy hramadzianin, bo, kali ja zachvareju, heta naniasie škodu i mnie, i ludziam, jakija ja mahu patencyjna zarazić, i majoj krainie, jaje ekanomiki. Karaciej, ja idu za hetymi źviestkami na sajt, jak mnie zdajecca, najbolš kampietentnaha ŭ takich pytańniach orhana — Ministerstva achovy zdaroŭja Respubliki Biełaruś.

Tam ja sapraŭdy znachodžu niejkuju infarmacyju ŭ vyhladzie infarmacyjnaha lista «Ab zachvorvańni na vostryja reśpiratornyja virusnyja infiekcyi ŭ śviecie i respublicy pa stanie na 2013/01/28». Samy pieršy radok kaža nam, što list padrychtavany… «pavodle źviestak štotydniovaha biuletenia EuroFlu JERB SAAZ…» Vydatna!

Ale kali ja adkryvaju list, mianie čakaje rasčaravańnie. Nadzvyčaj ahulnaj infarmacyi pa Biełarusi roŭna 47 słovaŭ:

kolkaść tych, što zachvareli na VRZ raście (takoje zaŭždy adbyvajecca ŭ siezon VRZ), intensiŭnaść siaredniaja, znachodzicca na pieradepidemijałahičnym uzroŭni.

Kali šukajecie statystyčnyja źviestki, demahrafičny skład chvorych, dadzienyja pa łabaratorna padćvierdžanych vypadkach hrypu, hieahrafičnym raspaŭsiudžvańni vypadkaŭ hrypu i VRZ pa terytoryi Biełarusi, možacie śmieła pakidać sajt ministerstva i iści na sajt www.euroflu.org — čytać toj samy štotydniovy biuleteń EuroFlu,

dzie Suśvietnaja arhanizacyja achovy zdaroŭja publikuje źviestki pra hryp i VRZ. Tam vy znojdziecie našmat bolš infarmacyi pra Biełaruś, zmožacie prahladzieć niekotoryja hrafiki i dyjahramy. Jość paraŭnańni pa situacyi ź minułym hodam.

Samaje cikavaje — toje, što biuleteń padrychtavany pavodle źviestak pa dadzienych krain-členaŭ SAAZ. Zastajecca tolki atrymlivać biurakratyčny arhazm ad koła, pa jakim padarožničaje infarmacyja: ź Ministerstva achovy zdaroŭja ŭ SAAZ, ź biuletenia SAAZ na sajt Ministerstva achovy zdaroŭja, ale ŭ mocna skaročanym vyhladzie. Navat adzinaje za apošni čas maleńkaje paviedamleńnie pra dynamiku rostu zachvorvańnia źjaviłasia nie na sajcie Ministerstva achovy zdaroŭja, a na adnym ź infarmacyjnych partałaŭ.

Kali ja — žurnalist…

U vypadku, kali ja raptam apynuŭsia žurnalistam i chaču dać bolš šyrokija źviestki pa situacyi z hrypam i VRZ u Biełarusi, ja, zrazumieła, patelefanuju ŭ pres-centr ministerstva. Tam vietlivaja pres-sakratarka daść telefon hałoŭnaha epidemijołaha. Zdajecca, apieratyŭnuju statystyku pa hrypie u siezon mahčymaj epidemii hrypa mahli b štodnia pieradavać u pres-słužbu, ale što ž — mahčyma, u Ministerstvie samy niezaniaty čałaviek siońnia — heta mienavita hałoŭny epidemijołah, a voś u pres-słužbie akurat usie strašna, strašna zahružanyja, i my patelefanujem hałoŭnamu epidemijołahu.

Hałoŭny epidemijołah, zrazumieła ž, pahadžajecca adkazać na niekalki prostych pytańniaŭ, ale prosić dasłać ich faksam, kab troški padrychtavacca. Potym udakładniaje, što dasłać pytańni pažadana na firmovym błanku vydańnia. OK, hryp — heta takaja dalikatnaja, ekstraardynarnaja tema…

Pres-sakratarka prymaje faks, zapisvaje kantakty, kaža, što pieratelefanuje. Pračakaŭšy adkazu ŭvieś dzień, sam patelefanavaŭ u pres-słužbu. Vietlivaja pres-sakratarka zaŭpeŭniła, što ź listom usio dobra. Prosta jon ciapier čakaje podpisa namieśnika ministra achovy zdaroŭja (!).

Pa stanie na siońnia, vidać, jašče nie dačakaŭsia. I heta zrazumieła, bo možna sabie ŭjavić, kolki ŭ namieśnika ministra sapraŭdy važnych spravaŭ, akramia adpisak u ŚMI.

Chočaš viedać pra hryp? Vali na Zachad!

Toje, što ŭ Ministerstva achovy zdaroŭja z hrypam «nie zrasłosia», aburaje. Ale «dabić» luboha prahnaha da infarmacyi čałavieka mohuć sajty zachodnich «minzdaroŭjaŭ».

Tam u adkrytym dostupie štotydzień źjaŭlajecca infarmacyi, jakaja nie tolki kanstatuje isnavańnie chvaroby pad nazvaj «hryp» na płaniecie Ziamla, ale i daje vyčarpalnuju infarmacyju pra epidemijałahičny stan, kolkaść chvorych, paraŭnalnuju dynamiku, dyjahramy, tłumačeńni…

Na sajcie Departamienta achovy zdaroŭja Złučanaha Karaleŭstva možna znajści štodzionnyja statystyčnyja źviestki pa hrypie i VRZ. U Niamieččynie hrypu ŭ krainie pryśviečany ahromnisty sajt, jaki, adnak, prapanuje spasyłki jašče na dźvie krynicy. Toje samaje ŭ Francyi — čytaj-začytajsia, razhladaj hrafiki, analizuj. Sapraŭdny šok možna atrymać ad raździeła sajta amierykanskaha Centra pa kantroli za zachvorvańniami, pryśviečanym hrypu — možna «zavisnuć» nadoŭha i niezaŭvažna napisać dysiertacyju. Pry hetym ni kolkaść chvorych, ni ich demahrafičny skład, ni ŭzrovień śmiarotnaści nie źjaŭlajecca tajamnicaj.

Zachodnija hipakraty paniki nie bajacca. Naadvarot, tam razumiejuć, što najaŭnaść adkrytych źviestak dapamahaje ludziam spłanavać svajo žyćcio, kamandziroŭki, aktyŭnaść.

Kiryła Chilko

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH