U Minsku źniali rekłamu biełaruskaj movy «Ma-ma=mo-va». Na jaje miescy ciapier inšaja sacyjalnaja rekłama — za raździelny zbor śmiećcia i suprać paleńnia. A ŭ abłasnych centrach jana zastałasia.
Dyrektarka rekłamnaj kampanii «CityLight» Volha Vielikasielec paćvierdziła, što płakaty «Ma-ma=mo-va» pastupiła rasparadžeńnie źniać: «My vykonvajem techničnyja funkcyi. Pastupiła zamova raźmiaščać płakaty — raźmiaščajem. Zaraz sapraŭdy jość prośba źniać — my zdymajem. Heta tyčycca vyklučna płakataŭ, na jakich na fonie školnaj doški napisana «Ma-ma=mo-va». Sieryja «Jakim budzie tvajo pieršaje słova na rodnaj movie?» zastajecca».
Ad jakoj instancyi pastupiła rasparadžeńnie, dyrektarka skazać admoviłasia.
Płakaty «Ma-ma=mo-va» i «Jakim budzie tvajo pieršaje słova na rodnaj movie?» drukavalisia na vinile, tamu jany mohuć vykarystoŭvacca šmatrazova. Heta značyć, što kali demanstracyjnaje miesca było vykuplena kamiercyjnaj rekłamaj, to sacyjałka moža «pierajechać» u inšaje, albo viarnucca na minułaje paśla skančeńnia apłočanaha času kamiercyjnaj rekłamy.
Adnak pa vulicy Kalinoŭskaha płakat z nadpisam «Majo pieršaje słova «Dziakuj» źmianili na rekłamu tut.by.
U firmie «BigBord», jakaja zajmajecca raźmiaščeńniem rekłamy ŭ Hrodnie , ekanamist firmy Iryna Suvorava patłumačyła , što rekłamu źmianili tamu, što hetaje miesca vykupiŭ zakazčyk.
A ŭ Homieli rekłama pa-biełarusku navat pašyryłasia. Na dadatak da raniejšaj sacyjalnaj rekłamy pra rodnuju movu na vulicy Savieckaj źjavilisia jašče 3 biłbordy
Vialiki biłbord «Ma-ma = mo-va. Lubiš mamu?» źjaviŭsia na cotnym baku vulicy Savieckaj pablizu novaha ŭniviermaha «Homiel». Anałahičny biłbord zachavaŭsia i na druhim baku.
Hladzi taksama: Bie-ła≠ruś: reakcyja na źniaćcio moŭnych płakataŭ — dematyvatar
