U Mahilovie pryčynaj paškodžańnia vodapravoda stała pamyłka ŭ prajektnaj dakumientacyi pry budaŭnictvie novaha doma. Truba z chałodnaj vadoj akazałasia prakładziena nie tam, dzie było patrebna zhodna sa schiemaj kamunikacyj,zajaviŭ Kanstancin Kožyč, dyrektar TAA «Domabudavańnie», jakoje vystupaje zabudoŭščykam novaha žyłoha doma.
Nahadajem, 15 studzienia kala 15.00 na miescy budaŭnictva žyłoha doma ŭ mikrarajonie Jubilejny zdaryłasia avaryja — prarvała trubu z chałodnaj vadoj. Za paru hadzin uvieś katłavan pryblizna 17 na 17 mietraŭ i hłybinioj bolš jak 2 mietry byŭ zapoŭnieny vadoj.
Zhodna z dakumientam, zaćvierdžanym u tym liku pradpryjemstvam «Harvodakanał», truby z chałodnaj vadoj u hetym miescy nie pavinna było być, tamu ekskavatarščyk spakojna pracavaŭ, rastłumačyŭ Kožyč. Truba była paškodžana, kali ekskavatar kapaŭ katłavan.
«Ja ŭbačyła z akna vialiki słup vady. Spačatku padumała, što heta pył ci śnieh»,— raspaviała adna z žycharak prylehłych da budaŭnictva damoŭ, jakaja stała śviedkaj pačatku avaryi.
Na praciahu nočy mašyna MNS adpampoŭvała vadu z katłavana ŭ liŭnievuju kanalizacyju. Siońnia ranicaj vada była całkam adpampavanaja.
Značnych pierapynkaŭ u padačy vady ŭ bližejšyja damy nie było.\
Miascovyja žychary vystupajuć suprać budaŭnictva novaha žyłoha doma, pad uźviadzieńnie jakoha byŭ vysiečany skvier. Tut raźmieščany žyły masiŭ sa staroj zabudovaj, pieravažna chruščoŭki.
Avaryja stała čarhovym šturškom da vykazvańnia niezadavolenaści miascovych žycharoŭ budaŭnictvam šmatpaviarchoŭki. «Kolki heta budzie ciahnucca? Na praciahu dvuch miesiacaŭ viadziecca vajna. Ni adzin načalnik, ni mer, nichto nas nie choča słuchać. My heta tak nie pakiniem, budziem źviartacca ŭ Administracyju prezidenta», — zajaviła adna z žycharak.
