Boeing 787 Dreamliner japonskaj avijakampanii All Nippon Airways. Fota ź Vikipiedyi.
Sałon
Adryŭ Boeing 787 ad ziamli. Fota z Flickr.
Trap la chvastavych dźviarej. Fota z Flickr.
Ruchavik Rolls Royce. Fota z Flickr.
Roznakalarovaja padśvietka sałona. Fota z Flickr.
Boeing 787 Dreamliner paśpieŭ adlatać tolki hod kamiercyjnaj ekspłuatacyi, ale japonski avijapieravozčyk All Nippon Airways pryniaŭ rašeńnie spynić na niavyznačany čas paloty siamnaccaci svaich «łajnieraŭ mary» praz paŭtornyja techničnyja prablemy paśla taho, jak 16 studzienia piłoty rejsa z prefiektury Jamahuci ŭ Tokia byli vymušany zrabić čarhovuju avaryjnuju pasadku. Jak paviedamlajecca, jany zaŭvažyli ŭ kabinie dym i adčuli niepryjemny pach. Taksama na pult kiravańnia pastupiŭ sihnał pra niaspraŭnaść batarei. Paśla zajavy All Nippon Airways jašče adna japonskaja avijakampanija Japan Airlines spyniła paloty Boeing 787.
Hety incydent z Boeing 787 staŭ užo siomym u 2013 hodzie. Što ž zdarałasia z hetymi samalotami?
Vycieki paliva i alivy: 8 studzienia 2013 hoda ŭ aeraporcie Bostana (ZŠA) u «Drymłajniera» była zafiksavana ŭciečka paliva. Takaja ž situacyja adbyłasia i 13 studzienia hetaha hoda ŭ aeraporcie Naryta ŭ Tokia. 11 studzienia 2013 ŭ aeraporcie Mijadzaki techniki zafiksavali vycie alivy z ruchavika. 5 vieraśnia 2012 mahčymaja ŭciečka alivy (ci inšaj techničnaj vadkaści) vyklikała zadymleńnie ruchavika pry padrychtoŭcy da ŭźlotu.
Elektrapravodka i elektraabstalavańnie: 14 śniežnia 2012 Boeing 787 Qatar Airways vymušana pryziamliŭsia ŭ Łondanie praz defiekt elektrahienieratara. 7 studzienia 2013 hoda ŭ japonskim «Boinhu», što stajaŭ u aeraporcie Bostana, zaharełasia batareja.
Šasi: 6 listapada 2011 hoda ŭ Boeing 787 častkova nie vyjšła šasi, i piłoty byli vymušany vypuścić šasi ŭ ručnym režymie. A 9 studzienia All Nippon Airways nie vypuściła «Boinh» praź niaspraŭnaść tarmaznoj sistemy.
Akramia hetaha, 11 studzienia 2013 hoda taksama ŭ Boeing 787 tresnuła łabavoje škło kabiny piłotaŭ. 4 śniežnia 2012 hoda samalot amierykanskaj United Airlines avaryjna pryziamliŭsia praź niavyznačanyja techničnyja pryčyny.
Ułady ZŠA i Japonii ŭžo abviecili maštabnuju pravierku aviałajnieraŭ, a taksama ich vytvorčaści.
Boeing 787 Dreamliner — dalokamahistralny samalot, jaki moža pralacieć 15 tysiačaŭ kiłamietraŭ biez dazapraŭki i ŭziać na bort da 250 pasažyraŭ. Boeing 787 Dreamliner byŭ adnym z samych doŭhačakanych pasažyrkich łajnieraŭ. Jaho spadziavalisia vykarystoŭvać na dalokich linijach. Jon staŭ pieršym pasažyrskim łajnieram, u jakim 50% vahi — kampazitnyja materjały. «Boinh» zajaŭlaje, što «Drymłajnier» raschoduje na 20% mienš paliva za Boeing 767 takoha ž pamieru.
Kampanija Boeing płanavała vyvieści Dreamliner u kamiercyjnuju ekspłuatacyju jašče ŭ 2008 hodzie, ale hetaja padzieja adkładałasia niekalki razoŭ. Pieršy kamiercyjny palot hetaj mašyny adbyŭsia 26 kastryčnika 2011 hoda. Na siońniašni dzień Boeing pastaviła 49 samalotaŭ pry 848 najaŭnych zamovach.
Asnoŭnyma kankurentami Boeing 787 Dreamliner źjaŭlajucca samaloty Airbus 330, Airbus 380, a taksama Airbus 350, jaki ciapier znachodzicca na stadyi raspracoŭki.
