Rynak na minskim stadyjonie «Dynama» budzie pracavać da lutaha nastupnaha hoda. Pra heta 1 śniežnia padčas subotnika pa padrychtoŭcy da pačatku rekanstrukcyi stadyjona paviedamiŭ žurnalistam načalnik upraŭleńnia fizičnaj kultury, sportu i turyzmu Minharvykankama Alaksiej Prakapovič.
Pavodle jaho słoŭ,
u paniadziełak łarki ź vierchniaj častki rynku, jakaja raźmieščana pobač z centralnym uvachodam, buduć pieraniesienyja na nižniuju ŭschodniuju častku. «Rynak budzie pracavać usie bližejšyja śviaty. Ja dumaju, što heta budzie śniežań i studzień»,— skazaŭ Prakapovič. Jon adznačyŭ, što rekanstrukcyja budzie paetapnaj, tamu «ŭschodniaja častka budzie bolš ci mienš svabodnaj. «Chaj pracujuć, handlujuć, prynosiać stadyjonu srodki na jaho ŭtrymańnie», — adznačyŭ čynoŭnik.
Jak raniej paviedamlałasia, 13 listapada RHA «Pierśpiektyva» źviarnułasia da Alaksandra Łukašenki z prośbaj pakul nie zakryvać rynak na stadyjonie «Dynama». U zvarocie adznačałasia, što ciapier na rynku «Dynama» pracujuć 326 arandataraŭ. U suviazi ź bližejšymi rabotami pa rekanstrukcyi ŭsie pradprymalniki atrymali pradpisańni ab nieabchodnaści vyzvalić zajmajemyja płoščy da 1 śniežnia hetaha hoda.
Jak adznačała «Pierśpiektyva», u jakaści alternatyvy viadzieńnia biźniesu Minharvykankam prapanavaŭ arandataram pierajechać sa svaimi paviljonami na placoŭku ŭ HD «Ždanovičy» ci rynak u mikrarajonie Kurasoŭščyna, jakija najbližejšym časam płanujecca taksama zakryć na rekanstrukcyju, što «robić biessensoŭnym pierajezd pradprymalnikaŭ na ŭkazanyja terytoryi».
Pavodle mierkavańnia «Pierśpiektyvy», vopyt realizacyi inviestprajektaŭ u Minsku «śviedčyć, što vysialeńnie pradprymalnikaŭ da pačatku praviadzieńnia rabot nie zaŭsiody apraŭdanaje». Pradprymalniki prasili prezidenta «akazać sadziejničańnie ŭ pieranosie terminu pradpisanaha arandataram vyzvaleńnia zajmanych płoščaŭ». «Taksama źjaŭlajecca vidavočnym, što praca moža pravodzicca paetapna i na čas demantažu naviesu nad trybunami stadyjona „Dynama“, usie arandatary z „vierchniaj handlovaj placoŭki“ hatovyja pieramiaścicca na „nižniuju“, dzie jość dastatkovyja dla hetaha płoščy, što stanie dadatkovaj krynicaj pastupleńnia arendnych i padatkovych płaciažoŭ u biudžet», — adznačałasia ŭ zvarocie.
