Загінуў на вайне з Украінай яшчэ адзін расійскі генерал
Расійскія СМІ паведамілі пра гібель генерала-маёра Узброеных сілаў Расіі Уладзіміра Завадскага. Верагодна, ён падарваўся на міне ў тыле расійскіх войскаў.
29.11.2023 / 18:45
Пра смерць Завадскага 28 лістапада паведаміла ў сацсетцы «Вконтакте» арганізацыя выпускнікоў Маскоўскага вышэйшага агульнавайсковага каманднага вучылішча «Крэмль». Увагу на публікацыю звярнулі журналісты выдання «Важные истории».
Прычына смерці Завадскага ў тэксце не ўдакладняецца, аднак крыніца тэлеграм-канала «ВЧК-ОГПУ» сцвярджае, што генерал-маёр загінуў, падарваўшыся на міне ў тыле, «у аддаленні ад лініі баявога сутыкнення».
«Важные истории» адзначаюць, што гэта ўжо 12-ы выпадак гібелі вышэйшых расійскіх вайсковых афіцэраў на развязанай Расіяй вайне супраць Украіны. Афіцыйна расійскія ўлады, праўда, прызналі толькі смерць сямі.
Уладзімір Завадскі быў намеснікам камандзіра 14-га армейскага корпуса УС РФ.
Пакуль што самы высокапастаўлены афіцэр УС РФ, забіты на гэтай вайне — намеснік камандуючага Паўднёвай вайсковай акругі генерал Алег Цокаў. Ён загінуў летам гэтага года ў Бярдзянску, як мяркуецца — пры ўдары па камандным пункце расійскай 58-й арміі.
Чытайце таксама:
Генштаб Украіны заявіў, што расійскія войскі спрабуюць наступаць па ўсім фронце
Вальфовіч: Польшча і краіны Балтыі не стануць нападаць на Беларусь
Былы работнік спіртзавода з-пад Ельска, брат якога загінуў за Расію, паехаў у «ДНР» з гуманітаркай