СК правярае дзве версіі выбуху на заводзе ў Светлагорску
Следча-аператыўная група працягвае працаваць на месцы аварыі на Светлагорскім ЦКК, паведаміў афіцыйны прадстаўнік СК Аляксандр Сухадольскі.
08.06.2023 / 13:26
Так выглядае цэх пасля «успышкі». Скрын з відэа МНС
«Паводле следства, 7 чэрвеня ў цэху выпарной станцыі па вытворчасці талавага алею Светлагорскага ЦКК праводзіліся тэхнічныя працы. Прыкладна ў 15: 40 адбылася ўспышка газапаветранай сумесі. У выніку выбуху загінулі тры работнікі прадпрыемства ва ўзросце 24, 31 і 42 гадоў. Яшчэ два чалавекі атрымалі цялесныя пашкоджанні», — -праінфармаваў прадстаўнік СК..
«Цяпер дапытаныя і дапытваюцца інжынерна-тэхнічныя работнікі камбіната і кіруючыя супрацоўнікі, задзейнічаныя на вытворчасці. Канфіскаваная дакументацыя, якая рэгламентуе правядзенне вытворчых і рамонтных работ, табелі працоўнага часу і іншыя неабходныя для следства матэрыялы», — адзначыў Сухадольскі.
Што тычыцца прычыны выбуху, то яна яшчэ высвятляецца. Следствам правяраецца версія фарміравання выбуховай газапаветранай сумесі ў ходзе правядзення рамонтна-ачышчальных работ без рэгламенту, а таксама версія аб дапушчаных парушэннях у тэхналагічным працэсе.
Распачата крымінальная справа па факце здарэння.
Аварыя на прадпрыемстве адбылася 7 чэрвеня прыкладна ў 15:30.
У тэлеграм-канале гомельскага тэлебачання ў 15:46 напісалі, што на тэрыторыі цэлюлознага камбіната адбыўся выбух, а ратавальнікі шукаюць дваіх работнікаў, якія знаходзіліся побач з месцам аварыі.
У пазнейшых афіцыйных паведамленнях гаварылася пра ўспышку газапаветранай сумесі ў цеплаабменніку. Яна адбылася падчас правядзення прафілактычных і рамонтных работ у цэху выпаркі шкіпінару.
Пра выбух пісалі і ў сацыяльных сетках.
«Сёння ў раёне 15:30 моцна бахнула з боку прамзоны. Праз непрацяглы час — сірэны машын, якія імчацца ў той бок», — гаворыцца ў адны з допісаў.
«Выбух быў вельмі моцны, і чулі як падалі розныя аскепкі, потым сірэна… Рэальна крыху былі на паніцы, з прычыны ўсёй абстаноўкі ў Гомельскай вобласці! Дай Бог, каб усе былі жывыя і дзякуй Богу, што гэта не звязана са СВА (вайной. — НН)!!!» — адзначыў аўтар аднаго допісу.
Жыхар Светлагорска расказаў «Нашай Ніве», што тэрыторыя камбіната была ачэпленая. Шмат міліцыі і следчых. Багата выліта пажарнай пены.
СК учора заявіў, што гаварыць пра дакладную колькасць загінулых і пацярпелых на Светлагорскім ЦКК рана, бо следчыя пакуль не маюць доступу да усёй пашкоджанай тэрыторыі. Магчыма, пад заваламі яшчэ ёсць людзі.
У 2020 годзе на светлагорскім прадпрыемстве ў выніку выбуху на чане ракітавага алею загінуў 40-гадовы зваршчык Аляксандр Русіновіч.
Вытворчасць беленай цэлюлозы спачатку ўзводзіла кітайская кампанія за кітайскія ж інвестыцыі. Але ў выніку канфлікту ў 2018 годзе кітайцы адмовіліся ад супрацоўніцтва з беларускім бокам. Даводзілі да ладу абсталяванне іншыя спецыялісты.
Запусцілі новую вытворчасць у 2020 годзе. Яна вырабляе сульфатную беленую цэлюлозу, якую выкарыстоўваюць у папяровай вытворчасці і вырабе некаторых будаўнічых матэрыялаў.
Чытайце таксама:
У санкцыйны спіс ЗША трапіла беларускае прадпрыемства «Светлагорск Хімвалакно»
Навагрудак застаўся без вады: на цэнтральным водаправодзе адбылася аварыя