Памёр ксёндз Эрнэст Будын, які амаль чвэрць стагоддзя служыў у Беларусі
Супольнасць Кангрэгацыі святароў Найсвяцейшага Сэрца Езуса ў Беларусі і Курыя Гродзенскай дыяцэзіі паведамілі, што 14 красавіка ў польскім Тухаве на 88-м годзе жыцця памёр ксёндз Эрнэст Будын, які з 1990 па 2013 год служыў на Гродзеншчыне.
15.04.2023 / 18:19
Ксёндз Эрнэст Будын. Фота: Sosnowiec.scj.pl
Падчас служэння ў Беларусі святар быў пробашчам парафіі святога Станіслава у Ляцку (Шчучынскі дэканат), а пазней — парафіі Божай Міласэрнасці ў Гродне (Вішнявец).
Ксёндз Эрнэст Будын нарадзіўся ў 1935 годзе ў Польшчы. Першыя манаскія абяцанні прынёс у 1952 годзе. Некалькі дзесяцігоддзяў быў эканомам манаскіх дамоў, вікарыем і пробашчам парафій у Польшчы.
У 1990 годзе прыбыў на працу ў Беларусь, у 2013 вярнуўся ў Польшчу, дзе стаў служыць у Сасноўцы Сілезскага ваяводства.
У Беларусі святую Імшу за спачылага ксяндза Эрнэста Будына правялі 15 красавіка ў парафіі святога Станіслава ў Ляцку.
Пахаванне спачылага святара адбудзецца 17 красавіка ў парафіі ў Стадніках. У 11.30 (па польскім часе) адбудзецца святая Імша, пасля — пахаванне на мясцовых могілках.
Чытайце таксама: