На літоўскай мяжы зафіксавалі новы рэкорд цыгарэтнай кантрабанды з Беларусі
На беларуска-літоўскаім памежным пераходзе Прывалка-Райгардас у мінулую пятніцу быў затрыманы грузавы цягач «ДАФ», якім кіраваў грамадзянін Беларусі. Мытнікам кіроўца фуры паказаў дакументы, з якіх вынікала, што ён нібыта перавозіць тарфяныя брыкеты транзітам з Беларусі праз Літву ў Польшчу. На першы погляд падавалася, што ў грузавіку сапраўды перавозяць тарфяныя брыкеты, але насамрэч аказалася зусім іначай.
22.03.2023 / 18:59
Фота: lrmuitine.lt
Візуальны агляд машыны паказаў, што ў задняй частцы паўпрычэпа і ў глыбіні фуры складзеныя паліўныя брыкеты выглядалі аднолькава. Усё было шчыльна абгорнута упаковачнай плёнкай.
Калі мытнікі праверылі грузавік з дапамогай сістэмы рэнтгенаўскага кантролю, то аказалася, што тарфяное паліва знаходзілася ўсяго ў чатырох паддонах у задняй частцы паўпрычэпа. Большую ж частку грузу складалі спакаваныя скрынкі кантрабандных цыгарэт.
Паводле папярэдніх звестак, у паўпрычэпе было выяўлена каля 2 тысяч скрынак з прыкладна 1 млн пачкаў тонкіх беларускіх цыгарэт. Кошт цыгарэт з падаткамі, якія павінны быць выплачаныя, складае 3,96 мільёна еўра.
Як паведамляе літоўская мытня, гэта самая буйная партыя нелегальных цыгарэт, канфіскаваных адначасова за апошнія гады. Мытнай крымінальнай службай Літвы пачата дасудовае расследаванне па факце кантрабанды.
Кіроўца-беларус, які кіраваў грузавіком, а таксама грамадзянін Украіны, які ехаў з ім на пасажырскім сядзенні, былі затрыманыя. У нядзелю, 19 сакавіка, па рашэнні Каўнаскага раённага суда абодва арыштаваныя на два месяцы.
Чытайце таксама:
Латвійскія памежнікі вылавілі ў Дзвіне кантрабандныя беларускія цыгарэты. 150 тысяч штук
Польскія памежнікі разграмілі найбуйнейшую ў гісторыі групу, якая займалася кантрабандай цыгарэт
У Літве затрымалі вельмі буйную партыю беларускіх кантрабандных цыгарэт