29 сакавіка ў сталічным Палацы спорту плануецца канцэрт Эміра Кустурыцы і No Smoking Orchestra, паведамілі БелаПАН арганізатары выступлення.
Яны зазначаюць, што No Smoking Orchestra — адна з самых незвычайных з'яў сучаснай еўрапейскай музыкі. Лічыцца, што "творчасць гурту — гэта своеасаблівае змяшэнне турэцкіх маршаў, цыганскіх матываў, паўднёваамерыканскага саўнда, рытмаў кантры, заходніх рэмінісцэнцый, акардэонаў, нацыянальных гітар і іншых прыкметаў таго, што гурт не паддаецца стылявой катэгарызацыі".
Мінскія гледачы ўжо мелі магчымасць пазнаёміцца з творчасцю гурту. Упершыню No Smoking Orchestra даў канцэрт у Палацы Рэспублікі ў снежні 2008 года. Летась сусветна вядомы сербскі рэжысёр Эмір Кустурыца стаў ганаровым госцем кінафестывалю "Лiстапад", правёў сустрэчы з прэзідэнтам Беларусі, са студэнтамі і журналістамі. Лукашэнка ўручыў яму адну з галоўных узнагарод фестывалю — спецыяльны прыз прэзідэнта "За захаванне і развіццё традыцый духоўнасці ў кінамастацтве".
Кошт білетаў на канцэрт No Smoking Orchestra 29 сакавіка ў Мінску
складзе ад 110 да 200 тыс. рублёў.