Расійскіх шпіёнаў амерыканцам «выдаў» мінчук? абноўлена + каментар КДБ 12

Пра гэта агенцтву «Рэгнум» паведаміў экс-супрацоўнік КДБ СССР Фёдар Якаўлеў.

Нагадаем, што раней у СМІ з’яўляліся супярэчлівыя звесткі аб прычынах, чаму засыпалася расійская шпіёнская сетка ў ЗША. Сярод іншага, стала вядома, што на бок амерыканцаў перабеглі палкоўнікі Службы вонкавай разведкі Расіі Шчарбакоў і Пацееў. Апошні апекаваўся расійскімі нелегаламі за мяжой.

Паводле словаў Якаўлева,

Аляксандр Пацееў родам з Мінску, ён служыў у КДБ у Беларусі. Яго бацька — Герой Савецкага Саюза, удзельнік Друго сусветнай вайны падпалкоўнік Мікалай Пацееў.

Кадэбіст Пацееў вучыўся на курсах удасканалення афіцэрскага складу, больш вядомых як «школа дыверсантаў». На іх рыхтаваліся кадры для спецназу КДБ СССР. У 1979 годзе яго накіравалі ў Афганістан у складзе групы спецназу КДБ «Зеніт». У 1981 году ён быў у кабульскай групе спецназу КДБ «Каскад-2». За ўдзел у баявых дзеяннях у гэтай групе ён быў узнагароджаны ордэнам. Пасля Афганістана Пацееў працаваў у замежнай выведцы КДБ СССР, затым у Службе вонкавай разведкі, даслужыўся да намесніка начальніка аддзела.

Як вядома, у чэрвені ФБР ЗША затрымала дзесяць чалавек. Ім выставілі абвінавачванні ў шпіянажы на карысць Расіі. Са словаў следчых, амерыканцы сачылі за іхнай дзейнасцю 10 гадоў.

Пазней дзесяць расейскіх шпіёнаў памянялі на чатырох чалавек, якія адбывалі тэрміны за шпіянаж у расійскіх турмах.

***

Аляксандр Мікалаевіч Пацееў ніколі не служыў ні ў КДБ БССР, ні ў КДБ Беларусі.

Пра гэта заявіў БелаПАН начальнік цэнтра інфармацыі і грамадскіх сувязей беларускага Камітэта дзяржбяспекі Аляксандр Антановіч, каментуючы паведамленні СМІ аб тым, што афіцэр знешняй выведкі РФ, які выдаў амерыканскім уладам групу расійскіх агентаў-нелегалаў, меў дачыненне да галоўнай беларускай спэцслужбы.

«Чалавек з такімі прозвішчам, імем і імем па бацьку не служыў ні ў КДБ БССР, ні ў КДБ Беларусі», — сказаў Антановіч.

МБ

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ