Другая МКАД будзе працягласцю 158 км, пабудуюць за 7 гадоў

Другая кальцавая аўтадарога агульнай працягласцю 158 км будзе пабудавана ў Мінску на працягу сямі гадоў. Гэта прадугледжана ўказам № 532 «Аб некаторых пытаннях будаўніцтва другой кальцавой аўтамабільнай дарогі вакол Мінска», які Аляксандр Лукашэнка падпісаў 13 кастрычніка.

Як паведамляе прэс-служба прэзідэнта Беларусі, у склад другой МКАД будуць уваходзіць існуючыя ўчасткі аўтамабільных дарог (73 км) і два новыя напрамкі руху аўтатранспарту (85 км).

У 2011–2014 гадах плануецца пабудаваць участак працягласцю 44 км (ад аўтамабільнай дарогі М-3 Мінск — Віцебск да аўтамабільнай дарогі М-6/Е 28 Мінск — Гродна — мяжа Рэспублікі Польшча).

У 2014–2017 гадах, паводле ўказа, павінен быць пабудаваны ўчастак працягласцю 41 км (ад аўтамабільнай дарогі М-6/Е 28 Мінск — Гродна — мяжа Рэспублікі Польшча да аўтамабільнай дарогі М-1/Е 30 Брэст (Казловічы) — Мінск — мяжа Расійскай Федэрацыі).

Для рэалізацыі праекта будаўніцтва аўтамабільнай магістралі спатрэбіцца 900 млрд. рублёў. Крыніцай указаных сродкаў вызначаны дзяржаўны мэтавы бюджэтны фонд нацыянальнага развіцця.

Андрэй Серада, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ