Рэчы ў абліпку візуальна падкрэсліваюць недахопы фігуры. Фота: інстаграм Алеся Мухіна
Прыталеныя футболкі
Такія майкі нярэдка сустракаюцца ў шафах спартовых хлопцаў, і гэта цалкам зразумела. Калі штодзень працуеш над сваімі мышцамі ў спартзале, надыходзіць час, калі нарэшце хочацца атрымаць узнагароду — захопленыя позіркі жанчын. Так у гардэробах з'яўляюцца цішоткі ў абліпку.
Але знарочыстая трансляцыя сваіх спартовых дасягненняў часта выходзіць бокам. Здаецца, выстаўляючы мацаванае цела напаказ, мужчына намагаецца схаваць іншыя недахопы ці агульную няўпэўненасць у сабе. У выніку хлопец у такой футболцы выглядае не як брутальны самец, а як «бабулін мача» ці рэпер Мэўл.
Фота: інстаграм спявака Мэўла
Каб падкрэсліць прыгожы стан, не абавязкова яго агаляць ці абцягваць. Можна набыць звычайную майку і падкатаць рукавы да сярэдзіны біцэпса ці абраць цішотку з паніжанай проймай — у такой плечы будуць здавацца шырэйшымі.
Але яшчэ горш выглядаюць прыталеныя рэчы на поўных людзях. У іх гардэробах такое адзенне з'яўляецца з-за адсутнасці пачуцця асабістых памераў.
Напрыклад, цішоткі вядоўцы і знаўцы тэлегульні «Што? Дзе? Калі?» Алеся Мухіна выглядаюць занадта цеснымі.
Рэчы ў абліпку візуальна падкрэсліваюць недахопы. Таму, калі вы раптам паправіліся, набывайце футболку па памеры — каб добра выглядаць, пакуль вяртаецеся ў форму.
Рваны дэнім ці джынсы «скіні»
Калі вы не падлетак, не эма і не аматар творчасці Мікіты Джыгурды, то ад такіх штаноў лепш пазбавіцца. Вузкія рваныя джынсы часта псуюць прапорцыю: робяць тулава доўгім, а ногі — кароткімі.
Фота: інстаграм спевака Руслана Аляхно
У спевака Руслана Аляхно дзве няўдалыя мадэлі. Выратаваць гэтыя камплекты могуць звычайныя чынасы ці прамыя пакарочаныя джынсы без дэталіроўкі.
Лагатыпы знакамітых брэндаў
Каб падкрэсліць свой статус, некаторыя мужчыны ператвараюцца ў хадзячую рэкламу брэндаў. Паказаць матэрыяльны дабрабыт праз адзенне намагаюцца палітык Юрый Васкрасенскі і блогер Улад Бумага.
Фота: інстаграм Васкрасенскага і Улада Бумагі
Любоў да гучных брэндаў на постсавецкай прасторы існуе з нагоды былога дэфіцыту. Людзі, якія ў 90-я вырваліся з галечы, імкнуліся паказаць новы статус усімі даступнымі сродкамі — у тым ліку і праз лога на адзенні. Звычка захавалася і дагэтуль.
Але заможныя людзі, у якіх ёсць густ, выглядаюць інакш і ў адносінах да гардэробу аддаюць перавагу «ціхай раскошы» — якасным рэчам без аляпаватых нашывак і з добрым кроем.
Лакавыя туфлі ў камплекце з джынсамі
У любога аўтфіта ёсць сваё прызначэнне, таму міксаваць у адным камплекце лакавы абутак і дэнім не варта — гэтыя рэчы з зусім розных стылёвых напрамкаў і пасуюць для розных жыццёвых абставін. Лак падыдзе для важнага свята ці тэатральнай прэм'еры, джынсы — для мерапрыемства на ўзровень ніжэйшага.
Фота: інстаграм Саладухі
Па аўтфіце Аляксандра Саладухі добра бачны гэты дысананс. Лук атрымаўся неаднародны і безгустоўны.
Заправіць усё!
Заблытацца ў тонкасцях патрабаванняў дрэс-коду даволі проста. Каб не памыліцца, калі запраўляць кашулю, а калі пакідаць яе падол выпушчаным, трэба запомніць няхітрыя правілы.
Кашулю заўсёды запраўляюць, калі пад ніжнім гузікам прышытыя запасныя — такую запраўляюць і ў штаны, і ў джынсы; калі ў кашулі строгі каўнер (напрыклад, высокі на гузіках або з адкладнымі вугламі) ці калі вы плануеце надзець яе са строгім гарнітурам.
Навыпуск кашулю носяць, калі яна кароткая і адносіцца да нефармальнага стылю і калі яе падол мае закругленую форму.
Фота: скрын з відэа БелТА
Швэдры, лангслівы і цішоткі звычайна не запраўляюцца, але прафесар Ігар Марзалюк гэтага не ведае. Не памыліцеся і вы.
Шкарпэткі і сандалі
Усё часцей на паказах вядучых модных дамоў сустракаюцца мужчыны-мадэлі, чые камплекты дапаўняюць доўгія шкарпэткі і сандалі. Аднак не ўсё, што адбываецца на подыумах, знаходзіць сваё месца ў паўсядзённым жыцці. Не надзявайце гэтыя рэчы разам.
Але лепей выкарыстоўваць двойку «сандалі і шкарпэткі», чым з'яўляцца на публіцы без аніякага абутку. Гэтае правіла датычыць падарожжаў: у самалётах, аўтобусах і цягніках здымаць абутак — кепскі тон.
Фота: скрын з відэа «Беларусь 1»
Аляксандр Лукашэнка босы ў транспарце не ездзіў, але неяк прыйшоў на інтэрв'ю тэлеканалу «Беларусь 1» без абутку. Зрэшты, гэта не адзінае яго стылістычнае дзівацтва.
Як не памыліцца жанчынам, складаючы свой гардэроб, можна даведацца з нашага іншага матэрыялу.
А якія стылістычныя памылкі вы б дадалі ў гэтыя спісы?
«Наша Нiва» — крыніца якаснай інфармацыі і бастыён беларушчыны
ПАДТРЫМАЦЬ «НН»
