Скрыншот з youtube.com/@chinchinchannelofficial
Дзе здымалі і пра што сюжэт
Здымкі адбываліся ў нямецкім замку ХІІІ стагоддзя.
У замку на памежжы Нямеччыны і Польшчы здымачная група працавала над зусім іншым праектам, але за тры дні да ад'езду нарадзілася думка зняць нешта яшчэ, выкарыстаўшы незвычайныя інтэр'еры, распавёў адзін з аўтараў сцэнарыя і рэжысёр фільма Андрэй Кашперскі:
«Уяўляеце, сярэднявечны нямецкі замак, белы, нечым вельмі падобны да псіхіятрычнай лякарні…
Мы дамовіліся з Мішам Зуем, акцёрам і суаўтарам сцэнарыя, што падумаем над новым сюжэтам. Назаўтра сустрэліся, і за колькі гадзін з'явіўся сцэнар пра клініку для псіхічнахворых, у якую воляй лёсу трапіла спявачка Алена ЖалудОК. Да яе прыязджаюць Мікалай Сяргеевіч і Сяргей Мікалаевіч, каб запрасіць выступіць на дзяржаўным мерапрыемстве.
Але яшчэ тры гады таму, калі мы прыдумлялі гэты вобраз дзяўчыны, якая наіўна верыць у дзяржаўную сістэму і спявае пра родны край — «Шчучыншчыну», мы меркавалі, што з ёй можа адбыцца нейкая трансфармацыя. І гэтую ідэю мы рэалізавалі. У першы ж дзень знялі ўсе ключавыя сцэны з чыноўнікамі, у другі — сцэны з Аленай ЖалудОК, яе сястрой і санітарам, а на трэці дзень заставалася зняць толькі неабходныя дэталі».
Паводле Андрэя Кашперскага, пасля прагляду знятага матэрыялу стала зразумела, што для фільма неабходная новая песня ў выкананні Алены ЖалудОК (актрысы Алены Зуй-Вайцяхоўскай) — чацвёртай пасля «Шчучыншчыны», «Дзекаць і цекаць» і менш вядомай песні «Кядышкі». На стварэнне тэксту, музыкі і здымкі відэакліпа спатрэбілася паўгода.
У новым фільме шмат адсылак да галівудскіх блокбастараў
У назве «ЧинЧины пролетели кукушкой» праглядаецца адсылка да вядомага рамана Кена Кізі і фільмаў, знятых па матывах гэтага твора.
Прадзюсарка Марыя Савушкіна дадае, што ў новым фільме ёсць шмат рэферэнсаў да папулярных узораў кінематографа мінулых гадоў — «Матрыцы» ці «Вострава праклятых». Яна спадзяецца, што тое, як пераасэнсавала гэты матэрыял каманда беларускіх фільммэйкераў, будзе цікава людзям старэйшага пакалення.
Але галоўная мэтавая група — гэта людзі ад 16 да 38 гадоў, якія жывуць у Беларусі, кажа прадзюсарка:
«Мы разлічваем зацікавіць маладых людзей, якім не ўсё адно, дзе яны жывуць. І для нас важна, каб гэта былі не толькі жыхары Мінска — мы хочам, каб фільм паглядзелі і жыхары рэгіёнаў. Хай бы паглядзелі і пазналі сябе і свае аграгарадкі».
Чыноўнікі Мікалай Сяргеевіч і Сяргей Мікалаевіч, ролі якіх выконваюць былыя купалаўцы Міхась Зуй і Дзмітрый Есяневіч, у гэтым фільме не галоўныя героі. Найважнейшы вобраз у ім — гэта маладая спявачка-актывістка, у светапоглядзе якой адбываюцца перамены.
Фільм здымалі на «голым энтузіязме»
Што да здымак, то рэквізіт для іх увогуле не куплялі. Выкарыстоўвалі той, які трапляўся на вочы і натхняў на стварэнне новых эпізодаў. Рэжысёр Андрэй Кашперскі прыгадвае:
«У дзяцей Мішы і Лены мы ўзялі падзорную трубу і кубік Рубіка. У фільме ёсць эпізод, дзе абодва чыноўнікі трымаюць кубікі Рубіка, але быў адзін, і давялося здымкі сумяшчаць на мантажы. Белых халатаў у нас было два, а персанажаў, якія ў іх здымаліся — тры. Таму былі здымкі з пераапрананнямі. Калі мы знайшлі мяцёлку — з'явіўся персанаж-дворнік…. Увогуле ж наша кіно спачатку нагадвае тыповую прадукцыю вытворчасці «Беларусьфільма», а ўжо потым пачынаецца нешта нетыповае».
На думку рэжысёра, парадыйны падыход да сучасных рэалій дапамагае гледачам адолець страх перад нібыта моцнай дзяржаўнай структурай, бо вельмі часта яна складаецца з недалёкіх, запалоханых начальствам чыноўнікаў кшталту Мікалая Сяргеевіча і Сяргея Мікалаевіча. Такія прадстаўнікі ўладаў болей смешныя, чым страшныя.
«Доўгі час беларуская аўдыторыя была пазбаўленая папулярнага культурнага і медыяпрадукту ў жанры палітычнай сатыры. Гэта адбывалася праз адсутнасць свабоды слова і пераслед творцаў, але мы кажам, што гэты час прайшоў. Мы публікуем фільм, свабодны ад усялякай цэнзуры, які немагчыма забараніць, ануляваць ці заблюрыць. Яго зможа паглядзець любы чалавек у Беларусі і за яе межамі», — кажа прадзюсарка Марыя Савушкіна.
Чытайце таксама:
У серыяле пра «Песняроў» заблюрылі сцэны з акцёрам-купалаўцам. Проста паглядзіце на гэтыя кадры
З афішы фільма пра «Песняроў» прыбралі акцёра-купалаўца
«Яна тысячагоддзямі шукае выйсця. Бог маўчыць». Купалаўцы прэзентуюць «Камедыю Юдзіфі»
У чым магія новага спектакля купалаўцаў, які прайшоў з аншлагам у некалькіх гарадах?
