Вайскоўцы 47-й асобнай механізаванай брыгады УСУ паднялі сцяг Украіны ў сяле Рабоціна (Запарожская вобласць). Скрын відэа
Кулеба на канферэнцыі паслоў Францыі распавёў, што проста цяпер Узброеныя сілы Украіны працягваюць прасоўвацца наперад у ходзе контрнаступлення, піша «УП».
«Гэта надзвычай складана. Колькасць мінных палёў і фартыфікацый беспрэцэдэнтная. Расійскія дроны, верталёты і самалёты дамінуюць у паветры. Але нам паступова ўдаецца. Некалькі дзён таму мы прарвалі расійскую абарону на адным з самых складаных участкаў фронту і вызвалілі стратэгічна важны населены пункт Рабоціна», — распавёў Кулеба.
Паводле яго, некалькі месяцаў украінскае падраздзяленне вяло бесперапынныя штурмы на гэтым участку фронту, але з-за знясілення і страт у нейкі момант страціла здольнасць працягваць наступ. Тады былі прынятыя «радыкальныя рашэнні»: у падраздзяленні змянілі кіраўніцтва.
Міністр распавёў, што новы камандзір папрасіў сабраць матываваных і гатовых выконваць баявыя задачы байцоў. Была створана зводная група з 31 байца, траціна з якіх не мела баявога вопыту, але ўсе яны мелі веды і волю да перамогі.
Па словах Кулебы, дзякуючы лідарству камандзіраў і сяржантаў гэтая група наладзіла «гарызантальныя сувязі» з сумежнымі падраздзяленнямі і прыступіла да працы на лініі судакранання.
«За 18 гадзін яны прапаўзалі літаральна на жыватах кіламетры мінных палёў, дзе на кожны квадратны метр расіяне паставілі па шэсць мін», — сказаў ён.
Падраздзяленне выбіла з пасадак расейцаў і двое сутак трымала пазіцыю, пакуль не падышло падмацаванне.
«Пасля гэтая група прайшла яшчэ 10 кіламетраў з заплечнікамі па 35-40 кілаграмаў вагі па мінных палях. Яны паспелі толькі коратка перавесці дыханне і адразу пайшлі на штурм умацаваных расійскіх пазіцый, выбілі ворага адтуль і пратрымаліся да падыходу асноўных сіл.
Усяго за 40 дзён гэта падраздзяленне правяло шэсць штурмаў і дзве выведкі.
Група з 31 чалавека выканала працу цэлага батальёна, які павінен быў бы складацца дзесьці з 400 чалавек. Страты склалі 7 параненых, з якіх адзін цяжкі, ён наступіў на міну.
Фактычна праца гэтай групы зрабіла магчымым наступ цэлай брыгады на Рабоціна і яго вызваленне пасля тыдняў штурмаў. Пасля замацавання на яго флангах мы адкрываем шлях на Такмак і, нарэшце, Мелітопаль і мяжу з Крымам», — сказаў Кулеба.
Сілы абароны Украіны спрабуюць прасоўвацца з контрнаступленнем у кірунку Такмака і Мелітопаля ў Запарожскай вобласці.
22 жніўня стала вядома, што ўкраінскія абаронцы з 47 брыгады з боем увайшлі ў сяло Рабоціна Запарожскай вобласці і арганізавалі эвакуацыю мірных жыхароў, расейцы тады абстрэльвалі сяло з артылерыі.
23 жніўня, у Дзень Дзяржаўнага сцяга Украіны, галоўнакамандуючы УСУ Валерый Залужны апублікаваў відэа з Рабоціна: над вёскай лунаў украінскі сцяг.
28 жніўня намеснік міністра абароны Ганна Маляр пацвердзіла, што сілы абароны цалкам вызвалілі сяло Рабоціна.
