Здымак ілюстрацыйны. Фота: boris radivojkov / vecteezy.com
З 1 лістапада ўводзіцца рэгуляванне тарыфаў на ўсе віды стаматалагічных паслуг. Сёння цэнаваму рэгулявання падлягаюць толькі некаторыя стаматалагічныя паслугі (артапедычныя і зубатэхнічныя). Плануецца, што з лістапада рэгуляванне закране паслугі тэрапеўтычнага, хірургічнага і артадантычнага профілю.
У Міністэрстве аховы здароўя растлумачылі, што гэта робіцца з мэтай павышэння цэнавай даступнасці платных стаматалагічных паслуг для насельніцтва. Зніжэнне кошту стаматалагічных паслуг у ведамстве абяцалі за кошт перагляду нормаў часу і расходу матэрыялаў на платныя стаматалагічныя паслугі.
Адпаведная пастанова ўжо апублікаваная на сайце Нацыянальнага прававога інтэрнэт-партала, яна ўвойдзе ў дзеянне таксама з 1 лістапада. У некаторых катэгорыях час на выкананне маніпуляцый скарацілася ад двух да пяці разоў.
«Зубамі трэба было займацца раней, тады не давялося б цяпер траціць такія грошы»
Святлана звярнулася ў прыватную стаматалогію аднаго з абласных гарадоў краіны, дзе жыве. Праблема была ў жавальным зубе — «сямёрцы», у якога быў даволі глыбокі скол.
Па словах лекараў, зуб ужо не падлягаў кансерватыўнаму лячэнню — яго нельга было рэстаўраваць. Каб выратаваць зуб, жанчыне прапанавалі паставіць на яго каронку, удакладніўшы, што нават гэта не дае гарантыі, што зуб прастаіць доўга.
«Лекар параіў не пераплачваць за каронку і прапанаваў паставіць самую звычайную металічную, сказаўшы, што зуб размешчаны далёка і не трапляе ў зону ўсмешкі. Я пагадзілася. У гэтай жа стаматалогіі я яшчэ зрабіла прафесійную чыстку зубоў».
Акрамя гэтага, жанчыне прыйшлося выдаляць яшчэ і корань аднаго з зубоў. Аказваецца, калі некалькі гадоў таму ў дзяржаўнай стаматалогіі выдалялі зуб, корань дасталі не цалкам. Гэта паказаў сённяшні здымак.
«Рэзюмуючы, магу сказаць, што зубамі трэба было займацца раней, тады не давялося б цяпер траціць такія грошы. У прынцыпе, на мой погляд, цэны ў прыватнай стаматалогіі, куды я звярталася, досыць прымальныя.
Колькі каштавала лячэнне?
Устаноўка каронкі + кансультацыя — 400 руб.;
Прафесійная чыстка зубоў — 125 руб.;
Выдаленне кораня зуба — каля 90 руб.;
Здымак — 40 руб.
Разам: 655 руб.
«Змагла сабраць за тры месяцы неабходныя грошы на імплантаванне без асаблівай шкоды для сябе і сям'і»
У Яўгеніі выдалілі тры жавальныя зубы на ніжняй сківіцы, якія ўжо не падлягалі лячэнню. Зубы былі дрэннымі з самага дзяцінства, удакладняе дзяўчына.
Пасля выдалення паўстала пытанне, што рабіць далей. Лекар-артапед парэкамендаваў імплантацыю.
Вырашаючы, дзе яна будзе гэта рабіць, Яўгенія абрала дзяржаўную стаматалогію каля дома і пакуль не пашкадавала — кажа, што лекары трапіліся добрыя.
Яна прызналася, што ўсё жыццё ходзіць у дзяржаўную паліклініку лячыць зубы, але карыстаецца, як правіла, там платнымі паслугамі.
«Вырашыла ісці ў дзяржаўную, што хаваць, таму што ў прыватных стаматалогіях усё вельмі дорага. Больш за тое, хірурга-імплантолага, які працуе ў дзяржпаліклініцы, рэкамендаваў мой муж. Ён ставіў у яго імпланты і застаўся задаволены. Я таксама прачытала нямала водгукаў пра гэтага лекара. Яны былі вельмі добрыя.
Начыталася я і іншых водгукаў на сайце дзяржпаліклінікі. Нават страшна стала спачатку — чаго толькі людзі не пішуць: то ў кагосьці ў канале зуба застаўся зламаны інструмент, то яшчэ нешта.
Праўда, усе водгукі адносіліся да аддзела бясплатнай стаматалогіі. А мне трапіўся сапраўдны добры лекар, вялікі прафесіянал, так што мне пашанцавала».
Дзяўчына адзначыла яшчэ адзін важны нюанс, звязаны з дзяржаўнай стаматалогіяй. Пасля кансультацыі ў хірурга ў лютым запісаць на саму працэдуру ўстаноўкі імплантаў Яўгену змаглі толькі на травень.
«Гэта значыць, сваёй чаргі мне давялося чакаць тры месяцы. У прыватных стаматалогіях такіх чэргаў няма, але, з іншага боку, там і даражэй».
У колькі абышлося ўсё лячэнне?
Выдаленне шматкаранёвага зуба — недзе 125 руб.;
Лячэнне двух зубоў (без лячэння каналаў) — каля 190 руб.;
Прафесійная чыстка зубоў — каля 90 руб.;
Імплантацыя — 1850 руб.;
Устаноўка каронак на імпланты — 1350 руб. (гэтая працэдура яшчэ наперадзе, але такую суму агучылі ў стаматалогіі).
Разам: 3605 руб.
«Цяжка сказаць, дорага я заплаціла за стаматалагічныя паслугі ці не, бо мне няма з чым параўноўваць. Але, калі шчыра, я думала, выйдзе больш.
І калі ўлічваць той факт, што я з гэтымі імплантамі прахаджу, як я спадзяюся, некалькі гадоў, думаю, хутчэй нядорага. Калі шчыра, грошай, выдаткаваных на зубы, не шкада».
Яўгенія расказала, што змагла сабраць за тры месяцы патрэбныя ёй грошы на імплантаванне без нейкай шкоды для сямейнага бюджэту.
«Цяпер буду збіраць на каронкі, якія мне паставяць толькі праз 3-6 месяцаў. А паколькі ўсё лячэнне — гэта працэс не аднамомантны, сабраць грошы цалкам для мяне рэальна».
«Зразумела, што такое лячэнне па кішэні далёка не ўсім»
Колькі Вячаслаў (імя зменена па просьбе суразмоўцы) сябе памятае, з зубамі ў яго былі праблемы. Зубы мужчына лячыў усё сваё жыццё. У апошнія гады яны сталі рухомымі, выпадалі. Лекары паставілі дыягназ парадантоз.
Сваіх зубоў на той момант у роце ў мужчыны амаль не засталося. Быў пастаўлены дыягназ: поўная адэнтыя верхняй і ніжняй сківіцы (адсутнасць зубоў).
Лекары рэкамендавалі Вячаславу паставіць імпланты — 8 штук, а на іх потым зафіксаваць здымныя пратэзы. Астатнія два зубы падлягалі выдаленню. Першым этапам ішла ўстаноўка часовага пратэза, затым — імплантацыя, а праз некалькі месяцаў — пратэзаванне.
«За адзін раз паставіць 8 імплантаў немагчыма, таму гэта рабілася ў два этапы. Спачатку мне паставілі 4 імпланты на верхнюю сківіцу, затым, прыкладна праз месяц, 4 на ніжнюю.
На імпланты паставілі часовыя пратэзы. Гэта трэба для таго, каб на працягу 3-6 месяцаў, якія праходзяць пасля ўжыўлення імплантаў, чалавеку было чым есці, плюс эстэтычная функцыя, каб чалавек не хадзіў без зубоў».
Пасля таго як паставілі імпланты, прыкладна паўгода даецца на тое, каб яны прыжыліся. Пасля заканчэння 6 месяцаў мужчыну вырабілі і паставілі на імпланты замест часовых пратэзаў пастаянныя.
«Памятаю, што ў самым пачатку лячэння мне сказалі адзін кошт, у выніку сума аказалася трохі вышэйшай. Лічу гэта нармальным. Паколькі падлічыць усё дакладна да рубля, калі гаворка ідзе пра імплантацыю і пратэзаванне, амаль немагчыма.
Колькі каштавала ўсё лячэнне?
Усё лячэнне абышлося прыкладна ў 20250 руб. (па курсе даляра, які быў тады, — каля 8 тыс. даляраў). З іх: каля 5800 руб. — імплантацыя, 14450 руб. — пратэзаванне. У гэтых фінансавых выдатках не ўлічаная купля ірыгатара і панарамныя здымкі (артапантамаграма).
«Я ўсведамляў, што гэта, вядома, вельмі дорага, але я таксама выразна разумеў, што сітуацыя ў маім выпадку склалася бязвыхадная. Так, я мог сабе гэта дазволіць, паколькі досыць нядрэнна зарабляю. Зразумела, што такое лячэнне па кішэні далёка не ўсім. Але я ведаю, што бывае і даражэй.
Памятаю, у самым пачатку мне раілі звярнуцца ў адну стаматалогію, але там толькі кансультацыя каштавала каля 100 даляраў».
Увесь працэс, звязаны з імплантацыяй і пратэзаваннем, успамінае мужчына, заняў па часе больш за год.
«Колькі разоў мне давялося наведаць стаматалагічную клініку, ужо і не ўспомню, але вельмі-вельмі шмат. А
аднойчы ў стаматалагічным крэсле з адкрытым ротам прыйшлося прасядзець каля 5 гадзін. Прыйшоў да 18.00, а скончылі толькі а 11-й вечара. Паверце, усё гэта няпроста далося.
Да ўсяго іншага, пасля ўстаноўкі імплантаў на твары з'явіліся моцны ацёк, сінякі. Яны праходзілі каля тыдня. Добра, што тады была зіма, плюс усе людзі яшчэ насілі маскі, так я і з'яўляўся ў масцы на працы, каб нікога не палохаць», — усміхаючыся, успамінае мужчына.
Журналісты папрасілі Вячаслава пракаментаваць рашэнне дзяржавы ўвесці дзяржрэгуляванне цэн на стаматалагічныя паслугі з 1 лістапада. Па словах мужчыны, нічога добрага ад усяго гэтага ён не чакае.
«Баюся, што пасля гэтага стануць закрывацца добрыя стаматалогіі і з іх будуць сыходзіць кваліфікаваныя лекары, а таксама знізіцца якасць самой паслугі. У чалавека павінен быць выбар, куды яму звяртацца па паслугу», — рэзюмаваў Вячаслаў.
Чытайце таксама:
Мінздароўя можа забараніць стаматалогіям выкарыстоўваць рэнтген. Праўда, не ўсім
