Фота: gettyimages
Нягледзячы на тое, што зманлівы кантэнт быў нарэшце выдалены, аўтарка Джэйн Фрыдман, імем якой прыкрываліся каварныя ШІ-піраты, непакоіцца, што адсутнасць выразнай, узгодненай палітыкі ў Amazon і іншых падобных кампаніях пакідае адчыненымі дзверы для іншых махляроў.
Джэйн Фрыдман — пісьменніца і сапраўдны ветэран амерыканскай выдавецкай індустрыі. Яна была прэзідэнткай і галоўнай выканаўчай дырэктаркай HarperCollins Publishers Worldwide, аднаго з вядучых сусветных англамоўных выдавецтваў.
У каментары для Gizmodo пісьменніца распавяла, што даведалася пра творы самазванцаў, напісаныя ШІ, пасля таго, як адзін з яе чытачоў натыкнуўся на іх на Amazon і звярнуўся да яе непасрэдна. Спачатку чытач падумаў, што дзіўная мова была спробай Фрыдман паэксперыментаваць з новым стылем пісьма. Нарэшце чытач зразумеў, што адрозненні, верагодна, былі большымі, чым проста стылістычныя адхіленні.
Аўтарка выявіла каля паўтузіна кніг, якія прадаваліся на платформе пад яе імем. Што яшчэ горш, Фрыдман сказала, што фальшывыя кнігі дадаюцца на яе афіцыйную старонку Goodreads — сайт агляду кніг, які належыць Amazon, куды многія чытачы звяртаюцца, каб знайсці творы пісьменнікаў.
Пісьменніца падала заяву аб парушэнні праз афіцыйную форму Amazon і атрымала аўтаматычны адказ. Кампанія папрасіла ў яе рэгістрацыйныя нумары гандлёвых марак, чаго, па словах Фрыдман, у большасці аўтараў проста няма. Amazon першапачаткова закрыў справу і сказаў ёй, што змесціва не будзе выдалена, паколькі яна не валодае аўтарскімі правамі на працы штучнага інтэлекту. Аднак праз некалькі гадзін прадстаўнік Amazon звязаўся з аўтаркай і сказаў, што яны разглядаюць справу далей.
Тым часам у (былым ужо) твітары нарастаў грамадскі рэзананс з боку іншых аўтараў і назіральнікаў. Нарэшце Amazon быў вымушаны выдаліць фэйкавыя творы аўтаркі са сваёй платформы. Прадстаўнік кампаніі патлумачыў, што ў іх «ёсць дакладныя рэкамендацыі па змесціве», якія рэгулююць, якія кнігі могуць быць выстаўлены на продаж.
Таксама ў заяве Amazon былі, канешне, і стандартныя словы пра вітанне водгукаў ад аўтараў, абавязковае выпраўленне праблем у выпадку памылкі і ўкладанне значных сродкаў для абароны ад зламыснікаў. Але калі прадстаўніка кампаніі папрасілі ўдакладніць, якое канкрэтнае правіла або пункт палітыкі кампаніі былі парушаныя, што прывяло да выдалення змесціва, створанага ШІ — Amazon адмовіўся ад далейшых каментароў.
Рэзюмуючы гісторыю, Фрыдман кажа, што кампаніі павінны сур'ёзна паставіцца да падобных праблем: «Гаворка ідзе не пра тое, каб закрыць штучны інтэлект ва ўсім свеце, а пра тое, каб суіснаваць з ім такім чынам, каб стваральнікі-людзі паважаліся і былі абароненыя ад таго, што некаторыя з дрэнных гульцоў збіраюцца зрабіць з тэхналогіяй».
Чытайце таксама:
У амерыканскіх школах забаранілі некаторыя кнігі згодна з парадай ChatGPT
На беларускім тэлеканале прагноз надвор'я вядзе штучны інтэлект — Багдан Завіруха
У ЗША выпрабавалі ўдарны беспілотнік пад кіраваннем штучнага інтэлекту
