Ігар Дашко
У Львове развіталіся з Героем Украіны, афіцэрам-памежнікам Ігарам Дашко, які ў красавіку 2022 года падарваў сябе ў заблакаваным расейцамі Марыупалі, каб ворагу не дасталася радыёстанцыя.
21 чэрвеня ў гарнізонным храме Святых апосталаў Пятра і Паўла ў Львове падчас паніхіды ўшанавалі памяць Героя і правялі гарадскую цырымонію развітання з воінам.
Цела загінулага год таму воіна аддалі зямлі толькі цяпер, бо працягваўся працэс вяртання цела, правядзення адпаведных экспертыз, у тым ліку ДНК-экспертызы. Чын пахавання стаў магчымым па выніках гэтай працяглай працы, як піша «Украінская праўда».
Развітацца з пабрацімам прыйшлі прадстаўнікі адміністрацыі Дзяржаўнай памежнай службы Украіны, калегі і персанал Заходняга рэгіянальнага ўпраўлення, 1-га памежнага атрада і 23-га атрада марской аховы, гараджане.
Ігара Дашко пахавалі на Марсавым полі.
За асабістую мужнасць і гераізм, праяўленыя ў абароне дзяржаўнага суверэнітэту і тэрытарыяльнай цэласнасці Украіны, самаадданае служэнне ўкраінскаму народу ў красавіку 2022 года прэзідэнт Уладзімір Зяленскі прысвоіў Дашко званне Герой Украіны (пасмяротна). Таксама афіцэру пасмяротна прысвоілі воінскае званне «палкоўнік». У ягоны гонар назвалі вуліцу ў Львове.
