Расія праводзіць вучэнні з выкарыстаннем аўтаномных пускавых установак стратэгічных ракетных комплексаў «Ярс». Пра гэта расійскім СМІ паведамілі ў Мінабароны РФ.
«У Іванаўскай вобласці аўтаномныя пускавыя ўстаноўкі рухомага грунтавога ракетнага комплексу «Ярс» Тэйкаўскага злучэння Ракетных войск стратэгічнага прызначэння здзяйсняюць інтэнсіўныя манеўраныя дзеянні на маршрутах баявога патрулявання ў рамках вучэнняў», — заявілі ў ваенным ведамстве.
Адзначаецца, што ў вучэннях задзейнічана каля тысячы вайскоўцаў РВСП, а таксама звыш ста адзінак тэхнікі.
Паводле афіцыйнай заявы, вайскоўцам трэба будзе адпрацаваць пытанні вываду ракетных комплексаў на палявыя пазіцыі, здзяйсненне маршу да 100 км, арганізацыю маскіроўкі і іншыя задачы. Таксама яны знішчаць умоўных дыверсантаў, якія па легендзе заклалі на шляху руху калоны дыстанцыйнае выбуховае прыстасаванне.