Прайшоў першы матч трэцяга кваліфікацыйнага раўнда футбольнай Лігі Еўропы. Адзіны прадстаўнік Беларусі, які працягвае змаганне ў гэтым турніры, сёння сустракаўся ў гасцях з швейцарскім «Цюрыхам».
Букмекеры перад гульнёй лічылі гаспадароў безумоўным фаварытам сустрэчы. Перамога «Цюрыха» расцэньвалася з каэфіцыентам 1 да 1,5. Перамога «Дынама» – 1 да 6. Можа, менавіта таму швейцарскія заўзятары слаба запоўнілі стадыён. Думалі, ну беларусаў раскатаем без праблем, а ў наступным раўндзе прыдзем на больш моцнага суперніка.
«Дынама» ж паднесла сюрпрыз. Каманда надзейна згуляла ў абароне. А таксама рэалізавала шанец у атацы. Адзіны гол у матчы быў забіты з пенальці на 63-яй хвіліне гульні Фатасам Бечыраем.
Сустрэча ў адказ пройдзе 6 жніўня ў Брэсце. Пачатак а 20:30. Мабыць, запаўняльнасць трыбун пасля такога выніку будзе гарантаванай.